I paralizuan skalpin e kokës, pacienti kërkon dëmshpërblim nga Spitali Sante Plus
Një transplant flokësh i kryer në shtator 2022 dhe i shkuar keq, është kthyer në një betejë gati katërvjeçare për Ilir G., i cili sot kërkon në gjykatë dëmshpërblim nga spitali “Sante Plus Group” në Tiranë. Skyweb.al ka siguruar padinë dhe dokumentet e procesit, ku pacienti pretendon se ndërhyrja jo vetëm dështoi, por i shkaktoi pasoja të përhershme shëndetësore.
Sipas tij, pas transplantit iu krijuan qese poshtë syve dhe, më rëndë, një mpirje e vazhdueshme në zonën e skalpit.
Ai e përshkruan këtë si “parestezi” dhe pretendon se konsultat e mëvonshme me mjekë specialistë e lidhën gjendjen me dëmtimin e nervave gjatë procedurës. Edhe pas më shumë se një viti, sipas tij, problemi nuk ishte rikuperuar.
Çështja ka shkuar në gjykatë dhe tashmë pritet shqyrtimi i saj dhe verifikimi i pretendimeve të qytetarit, i cili vijon betejen prej disa vitesh, duke mos hequr dorë edhe pasi është dhunuar disa herë nga policia private e Spitalit Sante Plus, që tashmë pas shumë skandalesh e ka ndryshuar emrin në International Medicare Hospital. Prej vitit të shkuar, spitali rezulton i mbyllur pasi policia kreu një operacion të madh në të duke shpallur në kërkim dy aksionerët dhe arrestuar administratörin me akuzën e evazionit fiskal.
Mbjellja e flokëve e shkuar keq
Sipas dëshmisë në gjykatë, siguruar nga skyweb.al, Ilir G. deklaron se kërkoi kartelën e tij mjekësore dhe dokumentin fiskal të pagesës, por Sante Plus refuzoi t’ia vinte në dispozicion. Në shkurt 2024 kërkesa u përsërit zyrtarisht përmes përfaqësueses së tij ligjore; sipas padisë, spitali nuk dha asnjë përgjigje.
Një nga elementet më të forta të pretendimit të pacientit lidhet me komunikimet që ai thotë se ka zhvilluar me drejtues të spitalit.
Në padi përmenden drejtoresha Geri Arapi dhe administratorja Gisela Xhallari. Sipas Ilir G., ato kishin pranuar se transplanti nuk kishte shkuar siç duhet dhe i kishin propozuar kthimin e parave, madje edhe përsëritjen e procedurës me shpenzimet e spitalit. Ai thotë se e refuzoi, pasi problemi nuk ishte më vetëm estetik, por dëmi që pretendonte se i ishte shkaktuar në sistemin nervor.
Padia dhe sekuestroja
Çështja tashmë ndodhet në Gjykatën e Tiranës. Paditësi kërkon kthimin e shumës së paguar, dëmshpërblim për dëmin jopasuror, ekzistencial dhe psikologjik, si dhe kryerjen e ekspertimeve mjeko-ligjore që duhet të përcaktojnë nëse dëmtimi është pasojë e ndërhyrjes.
Por gjyqi nis në një moment kur vetë Sante Plus është zhytur në një tjetër histori problematike. Në shtator 2025, Policia e Shtetit bllokoi një spital privat në zonën e Zogut të Zi, pas operacionit “Bilanci”. Hetimet konstatuan mbi 1 milion euro të ardhura të padeklaruara gjatë viteve 2024-2025, përdorim të medikamenteve të dyshuara të kontrabanduara ose të ndaluara dhe pesë punonjës të pasiguruar. Administratori Edmond Zaja u arrestua, ndërsa Bilal Kara, shtetas turk, dhe Geriana Arapi u shpallën në kërkim.
Një muaj më vonë, Prokuroria e Tiranës kërkoi sekuestrimin konservativ të të gjitha pasurive të shoqërisë. Hetimi kishte nisur pas denoncimit të një shtetasi portugez që kishte paguar 5,200 euro për tre ndërhyrje që, sipas kallëzimit, nuk iu kryen kurrë.
Kontrollet zbuluan mandate dore në vend të faturave fiskale, mbi 1 milion euro fatura jo tatimore dhe detyrime të konsiderueshme nga TVSH-ja dhe pagat e padeklaruara. Prokuroria ngriti gjithashtu dyshime se në spital punonin kryesisht mjekë turq pa licencë për ushtrimin e profesionit në Shqipëri.
Ndërsa në Shqipëri spitali u bllokua dhe pasuritë e tij u sekuestruan, faqja ndërkombëtare e Sante Plus vazhdon të reklamojë transplante flokësh dhe aktivitet në Turqi, Kosovë dhe Maqedoninë e Veriut, madje mban ende të listuar edhe Tiranën.
Redaksia e skyweb.al i është drejtuar Sante Plus Group për një koment në lidhje me padinë e I.Gjuzit, por deri në publikimin e këtij informacioni nuk morëm një përgjigje. /skyweb.al
