Një tjetër detaj ka dalë në dritë nga hetimet e SPAK për grupin e trafikut të kokainës që vepronte mes Amerikës Latine dhe Bashkimit Europian. Në bisedat e përgjuara në rrjetin e komunikimit Sky ECC, Ervis Çela, një nga anëtarët kyç të grupit, sugjeron hapjen e një fabrike leshi për të legalizuar kursimet e paligjshme të fituara nga aktivitetet kriminale.
“Çfarë pret? Të prish punë po të kesh dhe ndonjë firmë të vogël? U bënë 15 mln? Po kam një ide të hapësh një firmë leshi dhe të bësh fatura, të fusësh lekë në bankë… Kam gati 20 mln në Hollandë,” i thotë ai vëllait të tij, Albin Çelës, në një bisedë të përgjuar.
Ervis Çela dhe vëllai i tij ishin pjesë e një rrjeti të gjerë kriminal që përdorte biznese të tilla fiktive për të pastruar para të paligjshme dhe për t’i kaluar ato në sistemin financiar të Shqipërisë dhe Europës. Skema kishte si qëllim shmangien e kontrollit të organeve të drejtësisë dhe pastrimin e parave nga trafiku i drogës dhe aktiviteteve të tjera të paligjshme.
Në këtë skemë ka qenë i përfshirë edhe Soni Pepa, i arrestuar në fillim të shtatorit 2025 në Santo Domingo dhe më pas ekstraduar në Shqipëri. Ai ka depozituar më shumë se 1.2 milionë euro në llogari të grupit të trafikut të drogës, duke përfshirë një transaksion prej 300,000 euro në vitin 2021.
Bisedat e përgjuara tregojnë se Pepa, përmes metodave të sofistikuara transferimi, ka ndihmuar në kalimin e parave të paligjshme në Shqipëri, duke shmangur kontrollet doganore dhe duke përdorur shpesh shoferë autobusi për të transportuar paratë.