Një atentat mafioz tronditi Shkodrën mbrëmjen e së enjtes, ku u ekzekutua 34-vjeçari Kristian Kola. Vrasja ka ndodhur rreth orës 22:30, në lagjen “Vasil Shanto”, ndërsa ende nuk është përcaktuar një pistë hetimi nga policia e Shkodrës lidhur me vrasjen e 34-vjeçarit Kristian Kola. Burime pranë grupit hetimor bëjnë me dije se janë sekuestruar kamerat e sigurisë në zonë, të cilat mund të ndihmojnë në identifikimin e autorëve.
Kristian Kola parkoi automjetin e tij përpara një lokali pranë “Kinema Republika” dhe u fut brenda ku u takua me dy shokë të tij. Autorët, të cilët dyshohet të kenë qenë dy persona, kanë vëzhguar të gjitha lëvizjet e objektivit të tyre. Në momentin që ka dalë nga lokali, dy autorët me një motor dhe skafandra në kokë kanë qëlluar në drejtim të të riut, i cili humbu jetën në vend.
Objektivi ishte i qartë, pasi në momentin që autorët kanë qëlluar drejt 34-vjeçarit ai ishte edhe me një person tjetër, i cili i ka shpëtuar plumbave.
Nuk dihet nëse arma është silenciator, pasi burime nga policia përmes dëshmive që kanë mbledhur, thonë se qytetarët aty pranë kanë dëgjuar zhurmë, çka mund të çojë në dyshimet për një armë gjysmë silenciator.
Ndaj të ndjerit është qëlluar rreth 7-8 herë dh eplumbat e kanë kapur në gjoks. Pas vrasjes, autorët u larguan me shpejtësi drejt periferisë së qytetit. Policia ka arritur që përmes kamerave të sigurisë të gjurmojë një motor të ngjashëm, i cili humbet më tej nga objektivi nëpër rrugica lagjesh.
Motivi i kësaj vrasje deri më tani mbetet e panjohur për hetuesit, pasi i riu nuk kishte precedent të mëparshëm kriminal apo konflikte të hapura, dhe dëshmitë e familjarëve nuk kanë ndihmuar për të orientuar drejt një piste. I riu, bashkë me të atin kishin një kompani ndërtimi.