Ergys Agasi, i akuzuar nga SPAK për drejtimin e një grupi të strukturuar kriminal në dosjen e AKSHI-t, është mbajtur nën vëzhgim të vazhdueshëm nga policia në ditën e fundit para arrestimit të tij.
Sipas të dhënave të hetimit, forcat e policisë e kanë ndjekur lëvizjet e Agasit pothuajse gjatë gjithë ditës, ndërsa një dron ka dokumentuar me video dhe fotografi itinerarin e tij.
Agasi është pikasur mëngjesin e 26 gushtit në një kompleks vilash në zonën e Shkozetit, në Durrës, i njohur si një prej bazave të Visit të Pojës.
Pak para mesditës, ai është larguar nga kompleksi me një automjet luksoz dhe është nisur në drejtim të Elbasanit. Sipas burimeve të hetimit, Agasi ka qëndruar për rreth pesë orë pranë Tregut Agroushqimor, një aktivitet që rezulton në pronësi të babait të të shumëkërkuarit Suel Çela.
Pas qëndrimit në Elbasan, Agasi është nisur sërish drejt Durrësit. Gjatë kthimit, policia ka ndërhyrë dhe e ka arrestuar në zonën e Plepatit.
Bashkë me të është vënë në pranga edhe Uljan Shpataraku.
Lëvizjet e Agasit gjatë kësaj dite, sipas hetuesve, janë dokumentuar në kuadër të operacionit të posaçëm të ndjekjes, ndërsa materialet filmike të siguruara nga droni pritet të jenë pjesë e provave të administruara në dosjen hetimore.
Agasi është një prej personave të arrestuar në kuadër të hetimit të SPAK për dosjen e AKSHI-t, ku ai akuzohet për përfshirje në një grup të strukturuar kriminal.
Para ditës së arrestimit njoftohet patrulla e forcave shqiponja në Durrës që Ergys Agasi është në një makinë në lëvizje.
Ora 08:00 (26 gusht): Policia ngre pika kontrolli dhe dronin për vëzhgim nga ajri. Informacioni ishte që Agasi ishte akomoduar në kompleksin e vilave në Shkozet, të njohura si vilat e Visit të Pojës, Elvis Doçit. Ngrihet droni mbi kompleksin e vilave.
Ora 11:39: Ergys Agasi konstatohet duke dalë nga ambientet e katit të dytë të kompleksit të vilave, i veshur me bluze te bardhe dhe pantallona treçerekëshe ngjyrë te zeza. Agasi vazhdon në drejtim të hollit në katin e parë të kompleksit dhe futet ne ambientet e brendshme të kompleksit.
Ora 11:59: Droni konstaton se makina Audi A6, me portobagazh, ngjyrë e zezë, duke hyrë në ambientet e kompleksit, hyn në portën kryesore të kompleksit, vazhdon drejt parkimit nëntokësor të kompleksit të vilave. Për shkak të xhamave të zinj nuk mundet të konstatohet se kush ishte brenda
Ora 12:02: Nga pamjet me dron konstatohet se e njëjta makinë, vetëm pas 3 minutash del nga bodrumi i kompleksit të vilave, dh4e në sediljen e përparme, në krah të drejtuesit të mjetit, u vërejt një person që dyshohej se ishte Ergys Agasi (person në kërkim), i ulur pasagjer në sediljen e përparme të automjetit.
Ora 12:03: Makina vijon të ndiqet nga droni Automjeti Audi A6, del nga kompleksi i vilave, në drejtim të Nishtullës, rrethrrotullimit të Shkozetit, drejtim Plepave, ku futet nëpër rrugët në afërsi të shinave të trenit, që të nxjerrin në rrugën e Plazhit, Durrës, ku, pasi arrin në zonën e Plepave, vazhdon drejtimin drejt autostradës, në drejtim të Kavajës, Rrogozhinës, në drejtim të Peqinit, Elbasanit
Ora 13:35: Një orë e 32 minuta më pas makina nuk futet në qytetin e Elbasanit, por bën rreth rrotullimin e Bradasheshit, vazhdon në drejtim tregut agroushqimor, dhe kthehet djathtas për t’u futur aty brenda. Tregu agro ushqimor është në pronësi të babait të Suel Çelës. Droni nuk e mbajti më nën vëzhgim. Grupet e vëzhgimit, makinat e policisë u vendosën në rrethrrotullimin e Bradasheshit.
Ora 18:16: Makina del nga rruga “Kadri Hoxha” ku ndodhet tregu agroushqimor dhe vazhdon të njëjtin itinerar të mëparshëm, tashmë në krah të kundërt, nga Elbasani në drejtim të Durrësit. Sapo mbërrin në zonën e Plepave, në bashkëpunim dhe koordinim me shërbimet e tjera me uniformë të Drejtorisë Vendore Durrës, u bë i mundur arrestimit. Ku i gjetën Ergys Agasi (person në kërkim), i ulur nësediljen e përparme, dhe Uljan Shpataraku.
