Policia e Shtetit është vënë në kërkim të dy personave pasi akuzohen se kanë marrë peng një 56-vjeçar të quajtur Përparim Mehmeti, të cilit i është hequr liria për disa orë në zonën e Kamzës.
Për këtë ngjarje në kërkim është shpallur Elsaid Zekaj, 28 vjeç, dhe E. N., 28 vjeç.
Kërkimet për këta dy persona janë shtrirë deri në qytetin e Shkodrës, ku dyshohet se mund të jenë fshehur Elsaid Zekaj dhe bashkëmoshatari i tij.
Sipas policisë, ata kanë marrë peng 56-vjeçarin Përparim Mehmeti për shkak të një konflikti që kishin me djalin e tij.
Por si ndodhi ngjarja?
Mësohet se dy të rinjtë i kanë shkuar në banesë dhe e kanë thirrur 56-vjeçarin fillimisht për t’u sqaruar, ndërsa më pas janë larguar bashkë me të në makinë.
Ka qenë një familjar i 56-vjeçarit që ka denoncuar në polici rastin.
Pas disa orësh, 56-vjeçari është lënë i lirë, ndërsa në denoncimin që ka bërë, thotë se dy personat që i kanë hequr lirinë e kanë bërë këtë në formë presioni për një konflikt që kishin me djalin e tij. Ky i fundit jeton në Belgjikë dhe dyshohet se mund të jetë i përfshirë në trafikun e lëndëve narkotike.
“Thuaj djalit të na japë atë që na takon, pasi është e jona”, këto mësohet se kanë qenë fjalët që i janë thënë 56-vjeçarit nga dy të rinjtë e shpallur në kërkim.
56-vjeçari nuk ka shenja dhune, ndërsa ka shtuar se asnjë prej djemve të përfshirë në rrëmbimin e tij nuk e ka goditur.
