Dyshime për bashkëpunim nga brenda në grabitjen e 60 mijë eurove në OTP Bank, në arrest shtëpie punonjësi i sigurisë
Hetimet për grabitjen e rreth 60 mijë eurove në OTP Bank vijojnë, ndërsa grupi hetimor po verifikon pistën e një bashkëpunimi të mundshëm mes autorit dhe një punonjësi të bankës.
Ngjarja ndodhi më 2 qershor, kur një person i armatosur arriti të depërtojë në ambientet e brendshme të bankës, të marrë shumën e parave nga arka dhe të largohet menjëherë me një skuter.
Policia dhe Prokuroria e Tiranës kanë analizuar një sërë pamjesh filmike, duke arritur të rindërtojnë itinerarin e lëvizjes së grabitësit. Megjithatë, deri tani autori nuk është identifikuar.
Sipas burimeve hetimore, dy momente të veçanta kanë ngritur dyshime për një ndihmë të mundshme nga brenda bankës.
Momenti i parë lidhet me hyrjen e autorit në bankë. Ai është shfaqur në ambientet e saj menjëherë pasi punonjësi i sigurisë së derës, Fehmi Çcullhaj, ishte larguar për në tualet.
Në dëshminë e dhënë para hetuesve, Çcullhaj ka deklaruar se ndodhej në banjë në momentin e grabitjes dhe se kishte harruar të mbyllte derën e bankës nga brenda.
Momenti i dytë që ka tërhequr vëmendjen e hetuesve lidhet me kohën kur autori iu afrua arkës. Sipas verifikimeve, ai është shfaqur pikërisht pasi tre arkëtaret kishin marrë një sasi të konsiderueshme valute.
Nën kërcënimin e armës, ato i kanë dorëzuar grabitësit rreth 60 mijë euro. Hetuesit po verifikojnë nëse autori kishte informacion paraprak mbi lëvizjet financiare dhe shumën e parave që ndodhej në arkë.
Megjithëse dyshimet për një bashkëpunim të mundshëm janë të forta, deri në këtë fazë të hetimit nuk janë siguruar prova që ta vërtetojnë një gjë të tillë.
Më shumë se pesë persona janë shoqëruar dhe janë marrë në pyetje nga policia, por pas verifikimeve janë lënë të lirë. Aktualisht nuk ka asnjë person të identifikuar apo arrestuar si autor i grabitjes.
Ndërkohë, me kërkesë të Prokurorisë së Tiranës, Gjykata ka caktuar masën e sigurisë “Arrest në shtëpi” për punonjësin e sigurisë, Fehmi Çcullhaj.
Ai akuzohet për veprën penale të “Shpërdorimit të detyrës”.
