Rrjeti i supermarketeve Conad ka njoftuar tërheqjen e menjëhershme nga tregu të dy loteve të produktit Mortadella Bologna IGP, pas konstatimit të pranishmërisë së mikroorganizmave potencialisht patogjenë.
Mortadella Bologna IGP është një sallam i famshëm italian, me origjinë nga rajoni i Emilia-Romagna, i mbrojtur me treguesin gjeografik IGP (Indicazione Geografica Protetta).
Lajmi u publikua sot nga vetë grupi përmes kanaleve zyrtare të dedikuara për alarmet dhe njoftimet e tërheqjes së produkteve ushqimore, raporton skyweb.al.
Bëhet fjalë për Mortadella Bologna IGP Conad Freschi & Convenienti, e shitur e paraprerë në qese prej 100 gramësh.
Prodhimi kryhet për Conad nga kompania Salumifici Granterre Spa, në fabrikën e saj në Noceto, Parma.
Lote të prekura
Loti 26535005 – afat skadence më 13 tetor 2025
Loti 26535020 – afat skadence më 14 tetor 2025
Conad thekson se tërheqja është marrë në mënyrë parandaluese, pasi gjatë kontrolleve të brendshme mbi produktet me markë të vetë kompanisë u konstatua një “moskonformitet mikrobiologjik”.
Produkti është tërhequr nga raftet frigoriferike të supermarketeve Conad në Itali.
Konsumatorëve që mund të kenë blerë mortadellën e prekur, u kërkohet ta kthejnë në pikën e shitjes, ku do të marrin zëvendësim me një produkt tjetër ose rimbursim.
Ndërkohë, redaksia ka kontaktuar me Conad Albania duke pyetur nëse lotet në fjalë janë importuar apo jo në Shqipëri.