Pas përfundimit të hetimeve Prokuroria e Tiranës ka dërguar në gjyq tre punonjës të burgut 313 për ‘Shpërdorim detyre’.
Sipas njoftimit bëhet me dije se efektivët Bashkim Muça, Oldi Myzyri dhe Radion Maloku nuk kryen detyrën siç duhet duke mundësuar dy të burgosur konkretisht Arbër Çekaj e Fatmir Pjetri tentuan arratisjen para katër vitesh.
Më 8 gusht të vitit 2021 ata tentuan të arratiseshin nga qelitë e “Jordan Misja” (313) në kryeqytet, por pa mundur ta realizojnë. Gjatë tentativës të dy goditën dhe një prej policëve të burgut 313.
Kujtojmë se Gjykata e Lartë ka lënë në fuqi vendimin për dënimin me 14 vite burg të Arbër Çekajt, i cili u shpall fajtor për trafikimin e një sasie prej 613 kg kokainë që u sekuestrua në vitin 2018 në Portin e Durrësit. Lënda narkotike u gjet në një kontejner me banane që vinte nga Amerika Latine dhe ishte e destinuar për kompaninë “Arbi Garden”, në pronësi të Çekajt.
Ndërkohë Fatmir Pjetri ka qenë pjesë e një grupi kriminal ‘Babagjyshët’ gjatë periudhës Janar-Dhjetor të vitit 2013 dhe në vazhdim, në qytetet e Tiranës, Laçit, Fushë-Krujës, Kuçovës dhe Durrësit ku ka grabitur me armë disa argjendari në këto qytete.
Ai është dënuar me 30 vite burg për vjedhje me dhunë e kryer në bashkëpunim, grup të strukturuar kriminal dhe kryerjen e veprave penale nga organizata kriminale dhe grupi i strukturuar kriminal.
