Një ngjarje e rëndë është shënuar mbrëmjen e djeshme rreth orës 22:30 në ambientet e kompleksit “Delijorgji” në Tiranë, ku është dhunuar brutalisht pronari i restorantit “Tokyo”, Laert Kasaj.
Sipas burimeve, Kasaj është sulmuar nga disa persona që dyshohet se janë pronarët e barit “Stockholm”, një lokal që ndodhet përballë kompleksit. Konflikti mes tyre ka degraduar në përleshje fizike, ku janë përdorur grushte dhe dhunë e konsiderueshme ndaj viktimës.
Policia ka identifikuar dy nga autorët e dyshuar, Ferhat Kaja dhe vëllai i tij, të cilët janë shpallur në kërkim. Burime hetimore bëjnë me dije se një nga agresorët i është drejtuar viktimës me fjalët: “Pse më ke denoncuar?”, çka hedh dyshime se motivi i sulmit lidhet me një kallëzim të mëparshëm që Kasaj kishte bërë ndaj tyre.
Uniformat blu janë vënë në ndjekje të autorëve të dyshuar, ndërkohë që hetimet vijojnë për të zbardhur plotësisht rrethanat e ngjarjes.
⸻
Kush është i dhunuari, Laert Kasaj?
Laert Kasaj nuk është emër i panjohur për publikun dhe institucionet. Në shkurt të vitit 2017, kompania e tij Ratech ishte pjesë e një bashkimi kompanish që fituan një tender të Ministrisë së Drejtësisë me objekt: “Përmirësimi i sistemit të mbikëqyrjes elektronike në fushën penale”.
Tenderi, me vlerë 150 milionë lekë (rreth 1.5 milionë euro), parashikonte furnizimin me 300 byzylykë elektronikë për mbikqyrjen e të dënuarve me shërbim prove dhe mirëmbajtjen e sistemit për 4 vite. Përveç Ratech, pjesë e bashkimit ishin edhe Fastech e zotëruar nga Andis Papa dhe Soft & Solution e biznesmenit Ermal Beqiri.
Por pas dorëzimit të byzylykëve, shumë prej tyre rezultuan me probleme teknike dhe të papërdorshëm. Kjo situatë detyroi Shërbimin e Provës t’i kërkonte Policisë së Shtetit të merrte në mbikëqyrje të dënuarit, pasi pajisjet elektronike nuk funksiononin.
Si pasojë e kësaj situate, ish-ministri i Drejtësisë Gazmend Bardhi kallëzoi penalisht në prokurori sekretaren e përgjithshme të Ministrisë së Drejtësisë, Juljana Hoxha, në cilësinë e kryetares së Komisionit të Vlerësimit të Ofertave (KVO). Deri në atë moment, Ministria e Drejtësisë kishte paguar rreth 75 milionë lekë, ose gjysmën e shumës totale të kontratës.
Ngjarja e fundit rikthen në vëmendje figurën e Laert Kasajt, këtë herë jo si biznesmen i përfshirë në tendera publikë, por si viktimë e një sulmi të dhunshëm që mund të ketë rrënjë në përplasje më të hershme dhe më komplekse.
