Marta e 11 nëntorit shënoi fundin tragjik të një rruge të gjatë për Gilmando Danin, i njohur si një prej njerëzve më të afërt të grupit të Emiljano Shullazit. 47-vjeçari, vetëm një vit pas daljes nga burgu, u ekzekutua me breshëri automatiku në rrethrrotullimin pranë Aeroportit të Rinasit, menjëherë pas kthimit nga një udhëtim në Barcelonë.
Vetëm 25 minuta pasi avioni i tij kishte prekur pistën e Rinasit, Dani u qëllua për vdekje, ndërsa shoku i tij, Muçi Shaljani aktualisht agjent i Mbikëqyrjes Policore dhe drejtues i automjetit mbeti i plagosur rëndë me disa plumba në kokë dhe ndodhet në gjendje kritike në spitalin e Traumës, nën intubim.
Sipas burimeve autorët kanë vepruar me një plan të qartë dhe të koordinuar. Ata e kanë pritur Danin para aeroportit me një automjet Toyota me targa greke dhe kanë ndjekur makinën Benz të bardhë ku ndodheshin viktimat. Në momentin që mjetet janë afruar pranë rrethit të Rinasit, autorët kanë hapur zjarr me breshëri në drejtim të pasagjerit, duke siguruar vdekjen e menjëhershme të Danit.
Pas atentatit, autorët janë larguar me shpejtësi drejt Fushë-Krujës dhe kanë djegur automjetin në fshatin Halil, vetëm 14 kilometra larg vendngjarjes. Brenda mjetit të djegur janë gjetur tre kallashnikovë dhe një pistoletë, të cilat dyshohet se janë përdorur në ekzekutim.
Cenimi i sigurisë në një nga zonat më të ruajtura të vendit
Ngjarja ka ngritur shqetësime të mëdha për nivelin e sigurisë në Aeroportin e Rinasit, një nga pikat më të ruajtura dhe të monitoruara të vendit, ku supozohet të ketë prani të përhershme të policisë dhe strukturave të sigurisë. Fakti që atentatorët kanë vepruar në mes të ditës, në një zonë me trafik të dendur dhe kamera sigurie, tregon për një dështim të plotë të mekanizmave të kontrollit dhe reagimit policor.
Rrethrrotullimi pranë aeroportit, që ndodhet vetëm pak metra nga hyrja kryesore e Rinasit, është konsideruar prej kohësh një pikë strategjike për sigurinë kombëtare. Megjithatë, kjo ngjarje tregon se edhe në zemër të një zone që duhet të ishte e “blinduar”, krimi i organizuar arrin të godasë me saktësi dhe guxim.
Policia ka ngritur pika kontrolli në zonën e Fushë-Krujës dhe të Thumanës, ndërsa grupi hetimor po analizon pamjet e kamerave të sigurisë për të identifikuar autorët e atentatit
