Ish-drejtori i Përgjithshëm i Fondit të Sigurimit të Detyrueshëm të Kujdesit Shëndetësor, FSDKSH, Spartak Zekja u arrestua të martën me vendim të Gjykatës së Tiranës, pasi akuzohet për “falsifikim dokumentash” lidhur me një skemë fiktive të rimbursimit të ilaçeve në vlera të konsiderueshme.
Sipas një njoftimi të Prokurorisë së Tiranës, skema ka në qendër kompaninë farmaceutike CFO Pharma, e cila përmes dy kompanive të tjera të kontrolluara prej saj, akuzohet se ka bërë shit-blerje fiktive të barnave “Foster” dhe “Trimbow” me qëllim përfitimin e fondeve të rimbursimit nga FDSKSH.
Kompania CFO Pharma është në pronësinë e Nadir Çaushollit, i akuzuar edhe më parë për skema mashtruese me FSDKSH, por Prokuroria e Tiranës deklaroi se kishte shpallur në kërkim administratorin e tij, Frigul Milla për veprat penale të falsifikimit të dokumenteve dhe fshehjes së të ardhurave, e kryer në bashkëpunim.
Gjashtë masa të tjera më të lehta sigurie janë lëshuar ndaj punonjësve të FDSKSH, të cilët akuzohet se kanë bashkëpunuar në këtë skemë.
Hetimet për këtë çështje nisën pas kallëzimit në Prokurorinë e Tiranës nga administratori i kompanisë “Medicamenta”, importues ekskluziv i disa barnave, i licensuar dhe kontraktuar nga FSDKSH. Sipas kallëzimit, kompania CFO Pharma në bashkëpunim me “Pharma Plus dhe Medix Albania” dhe zyrtarë të Fondit kryenin veprimtari të kundraligjshme të shit-blerjeve fiktive të dy medikamenteve dhe falsifikimit të inventarëve me qëllim marrjen e parave të rimbursimit në mënyrë të padrejtë.
“Nga të dhënat e publikuara nga Fondi… u konstatua një skemë e organizuar me qëllim përfitimi korruptiv të fondeve të rimbursimit në vlera shumë të mëdha. Në qëndër të kësaj skeme të organizuar qëndron distributori farmaceutik “CFO Pharma” në bashkëpunim me zyrtarë të FSDKSH,” thuhet në njoftimin e Prokurorisë së Tiranës.
Sipas Prokurorisë, kompanitë “Pharma Plus” dhe “Medix Albania” janë themeluar “de fakto” nga pronari i CFO Pharma dhe kanë deklaruar gjendje fiktive të inventarit fillestar pranë Fondit, me qëllim vënien në jetë të skemës fiktive.
Më pas, kompania “Pharma Plus” akuzohet se ka deklaruar medikamente me vlerë 10 milionë lekë dhe kompania “Medix Albania” në vlerën 60 milionë lekë, pa kryer realisht asnjë blerje.
“Fakti i miratimit të këtyre inventareve fiktive si dhe lidhja e kontratave të këtyre subjekteve nga zyrtarë të FSDKSH tregon qartë përfshirjen e zyrtarve të Fondit si pjesë e kësaj skeme. Shitjet fiktive të “Pharma Plus” dhe “Medix Albania” janë bërë drejt “CFO Pharma”, e cila ka lëshuar fatura fiktive drejt disa farmacive,” thuhet në njoftimin e Prokurorisë.
Spartak Zekja e ka drejtuar Fondin e Sigurimit të Detyrueshëm të Kujdesit Shëndetësor deri në shtator të këtij viti, kur dha dorëheqjen, por skemat mashtruese me fondet e rimbursimit të medikamenteve kanë ndodhur edhe shumë përpara drejtimit të tij.
Një investigim i mëparshëm i BIRN zbuloi se farmacitë e lidhura me drejtuesit e Fondit përfituan miliona euro nga ilaçet. Një hetim i vitit 2015 i Prokurorisë së Tiranës zbuloi një skemë tjetër mashtrimi që kishte në qendër kompaninë “Omega Pharma”, e cila drejtohej në atë kohë nga Nadir Çausholli.
Çausholli u dënua me 2.6 vjet shërbim prove për mashtrim dhe falsifikim, por e apeloi çështjen duke marrë pafajësi në apel. Ndërsa kompania “Omega Pharma” u përthith nga kompania CFO Pharma, e zotëruar fillimisht nga babai i Çaushollit dhe më pas nga ai vetë.