Prona është një aset i rëndësishëm, jo vetëm në aspektin e banimit apo prodhimit në rastin e tokës, por konsiderohet edhe si një formë investimi apo sigurimi të ardhurash. Pavarësisht se të pasurit një pronë garanton qëndrueshmëri financiare dhe jo vetëm, ajo mbetet një aset që nuk sigurohet.
Edhe pse shtëpia dhe toka kanë qenë gjithmonë çështje të nxehta për shqiptarët, ne nuk kujdesemi që ta mbrojnë atë nga dëmtimet që mund t’i ndodhin prej ndonjë aksidenti, rrufesë, zjarreve, përmbytjeve, tërmeteve apo edhe vjedhjes.
Sipas të dhënave nga Autoriteti i Mbikëqyrjes Financiare, primet e shkruara bruto nga sigurimi prej zjarrit, forcave të natyrës dhe dëmtime të tjera në pronë zbritën në 1.8 miliardë lekë, duke pësuar kështu një rënie me 3.5% në krahasim me periudhën janar-korrik të vitit të kaluar.
Ky lloj sigurimi zë vetëm 13% të të gjitha primeve të sigurimit të jo-jetës.
Ashtu si në sigurimin e jetës ku 77% e kontratave vijnë për shkak të detyrimeve nga bankat, edhe sigurimi i pronës vijon të bëhet më së shumti në rastet kur banka jep kredi dhe e ka kusht që kredimarrësi të sigurojë jetën dhe pronën.
Nga ana tjetër, dëmet e paguara nga kompanitë e sigurimit për dëmtimin e saj nga zjarri dhe forca të tjera të natyrës kanë pësuar një rënie me gati 52%.
Së fundmi u hodh për konsultim publik edhe një projektligj që synon ta bëjë të detyrueshëm sigurimin e detyrueshëm ndaj tërmeteve. Duke marrë parasysh faktin që Shqipëria është një vend shumë i ekspozuar ndaj zjarreve, tërmeteve apo përmbytjeve, një skemë e tillë do të siguronte një mbrojtje më të mirë financiare për qytetarët dhe zvogëlonte barrën fiskale mbi buxhetin e shtetit, është shprehur Ministria e Financave.
Përgjatë këtyre muajve të verës, Shqipëria kaloi një situatë shqetësuese edhe me zjarret ku statistikat e Sistemit Evropian të Informacionit për Zjarret në Pyje tregojnë se deri më tani janë ndezur 114 zjarre dhe është djegur mbi 57 mijë hektarë sipërfaqe, dëmi më i lartë i shkaktuar që prej vitit 2007. /TvScan