Spaku në gjumë? Si po kanalizohen paratë e pista te banka izraelite JET BANK ?
Arben Ahmetaj ngre akuza të reja për një Data Center në Durrës, duke pretenduar se pas projektit qëndron biznesmeni të cilit i referohet si “Sani”, i njëjti emër që ish-zëvendëskryeministri e përmendi edhe kur foli për një marrëveshje të pretenduar pa tender në sektorin e Shëndetësisë.
Sipas Ahmetajt, projekti do të konsumojë 3.2 megavat energji në orë dhe do të përfitojë energjinë me çmimin e KESH-it. Ai ngre gjithashtu dyshimin se një kapacitet i tillë mund të përdoret edhe për prodhimin e kriptomonedhave, duke përmendur më pas Jet Bank si një destinacion të mundshëm për kanalizimin e tyre.
Pse hesht SPAK? Sani i JET Bank bankës izraelite ka kapur qeverinë? Fijet që Ahmetaj nxorri zbuluar
“Kemi përsëri Durrësin. Janë devijuar para të buxhetit të shtetit nëpërmjet heqjes së taksave të paligjshme. Pastaj do të shkojë Sani në Durrës, do të prodhojë këtë data center-in me çmimet e këtij dhe do të gëlltisë 3.2 megavat në orë në një data center, që ka shumë mundësi që me aq të prodhojë edhe kripto dhe pastaj të kanalizohen, larg qoftë, te Jet Bank. Pastaj të atashohen edhe biznesmenë vendas të të shpurës dhe t’i jepet çmimi i KESH-it. Po sikur të vijnë 100 data center-a, do t’ua japësh të gjithëve?”
Në qendër të denoncimit të Ahmetajt është pikërisht trajtimi që, sipas tij, do t’i rezervohet këtij investimi. Ai ngre pyetjen se përse një biznes privat duhet të furnizohet me energji me çmimin e KESH-it dhe nëse i njëjti standard do të zbatohej për çdo investitor tjetër që do të kërkonte të ngrinte një Data Center në Shqipëri.
Ahmetaj pretendon gjithashtu se projekti ka përfituar nga lehtësi fiskale, të cilat ai i përshkruan si “heqje të taksave të paligjshme”.
Ish-zëvendëskryeministri e lidhi “Sanin” edhe me denoncimin e tij të mëparshëm për Shëndetësinë, ku pretendoi se ish-ministrja Evis Sala nuk pranoi të firmoste një marrëveshje pa tender. Në atë rast, Ahmetaj pretendoi gjithashtu se pas “Sanit” qëndronte influenca e Ron Yefet.
Por në rastin e Durrësit, ai e vendos theksin te një tjetër çështje: përdorimi i parave dhe burimeve të shqiptarëve për favorizimin e një biznesi privat.
“Po, s’kam asnjë gjë me Sanin, le të bëjë biznes sa të dojë. Po jo të marrë paratë e shqiptarëve ky e t’ia kalojë Sanin.”
Ahmetaj përmendi gjithashtu kompaninë Aruba dhe kërkoi të bëhet publik emri i personit nga qeveria që, sipas tij, lidhet me këtë histori.
“Tjetra. Pse nuk jep tek, te Aruba, emrin e personit nga qeveria? Pse s’e jep, ta japë të na e nxjerrë atje. Se ka dhe një emër tjetër që ka qenë në Monaco. Ta nxjerrë dhe të shikojë se deri ku i shtrin Aruba metastazat.”
Pretendimi më i fortë mbetet megjithatë ai për konsumin e energjisë dhe destinacionin e mundshëm të kapacitetit të Data Center-it. Ahmetaj nuk deklaron si fakt se aty do të prodhohen kriptomonedha; ai thotë se me një konsum të tillë energjetik “ka shumë mundësi” që të prodhohen edhe kripto dhe më pas ngre hipotezën e kanalizimit të tyre te Jet Bank.
Në këtë pjesë të intervistës, Ahmetaj nuk paraqiti dokumente që të provojnë përdorimin e Data Center-it për prodhim kriptomonedhash apo kanalizimin e parave te Jet Bank. Këto mbeten dyshime dhe akuza të ngritura prej tij.
Por pjesa e denoncimit që kërkon përgjigje institucionale është konkrete: Kush qëndron pas Data Center-it në Durrës? Çfarë lehtësish fiskale ka përfituar? A do të furnizohet me energji me çmimin e KESH-it? Përse një biznes privat me konsum prej 3.2 MW duhet të marrë këtë trajtim dhe a do t’u ofrohej e njëjta tarifë investitorëve të tjerë?
Ndërsa për akuzën më të rëndë të Ahmetajt mbetet për t’u sqaruar: çfarë aktiviteti do të zhvillohet realisht brenda Data Center-it dhe mbi çfarë informacioni ish-zëvendëskryeministri mbështet dyshimin për prodhim kriptomonedhash dhe lidhjen e mundshme me Jet Bank?
