Wizz Air kundër shqiptarëve? Akuza të forta për abuzim masiv
Një reagim i fortë publik nga ish-ministri i Financave Arben Malaj ka rikthyer në vëmendje praktikat tarifore të kompanisë ajrore Wizz Air në tregun shqiptar, duke i cilësuar ato si abuzive dhe penalizuese për konsumatorët.
Në një postim në rrjetet sociale, Malaj rendit disa nga tarifat që, sipas tij, po përdoren si mekanizma ndëshkues ndaj udhëtarëve dhe po rrisin ndjeshëm koston reale të udhëtimit.Sipas reagimit të tij, kompania aplikon një tarifë prej 48 eurosh për pasagjerët që nuk kryejnë check in online, një shumë që përbën rreth 40 për qind të çmimit total të një bilete vajtje ardhje.
Ai thekson se shërbimet online, në rastet kur kompania ka sportele fizike në aeroport, duhet të jenë një opsion alternativ dhe jo një mjet penalizimi financiar për udhëtarët.
Një tjetër element i kritikuar është tarifa prej 78 eurosh për një valixhe shtesë deri në 20 kilogramë, e cila sipas Malajt është disproporcionale dhe në shumë raste më e lartë se vetë çmimi i biletës.
Sipas ish-ministrit, këto kosto shtesë e rrisin çmimin real të biletës me 35 deri në 60 për qind, duke mashtruar konsumatorin në momentin e blerjes dhe duke krijuar një perceptim të rremë për çmimin final të udhëtimit.
Ai ngre gjithashtu shqetësime serioze për mungesën e funksionimit të shërbimit të asistencës, duke deklaruar se nga tre numra kontakti, dy nuk përgjigjeshin, ndërsa asistenca në gjuhën shqipe ishte praktikisht e paarritshme, pasi sistemi telefonik e kthente vazhdimisht përdoruesin nga një opsion në tjetrin pa ofruar zgjidhje.
Malaj thekson se këto praktika nuk mund të konsiderohen thjesht politika tregtare agresive, por përbëjnë shkelje të të drejtave të konsumatorit dhe abuzim me pozitën dominuese në një treg me konkurrencë të kufizuar, siç është transporti ajror në Shqipëri.
Në fund të reagimit të tij, ai ngre pyetje të drejtpërdrejta për mungesën e reagimit institucional, duke kërkuar të dihet se kush i mbron realisht udhëtarët shqiptarë dhe ku janë Autoriteti i Konkurrencës, strukturat e Mbrojtjes së Konsumatorit dhe institucionet rregullatore të transportit ajror.Wizz Air është kompani që ka treguesit më të ulët më TrustPilot për shkak të praktikave zhvatëse ndaj pasagjerëve./skyweb
