Vrau me thikë Premtim Begën, kapet në Belgjikë Nasi Hodo
Një 29-vjeçar nga Saranda i shpallur në kërkim ndërkombëtar për vrasje është arrestuar në Belgjikë. Në korrik të vitit 2017 Nasi Hodo në bashkëpunim me një tjetër vrau me thikë Premtim Begën dhe plagosi rëndë Enea Myftarin gjatë një konflikti në fshatin Borsh.
Sipas hetimeve Viktima Premtim Bega ishte duke kaluar me makinë pranë një lokali, ku po qëndronin dy autorët Nasi Hodo dhe Xhonatan Muçaj. Për shkak të shpejtësisë, nga rruga e prishur është ngritur pluhur. Ky veprim në atë kohë iu duk i qëllimshëm autorëve, të cilët pasi ofenduan viktimën u konfliktuan edhe fizikisht, duke përdorur thika dhe sende të forta.
Ndërkohë Hodo është gjithashtu autor i plagosjes së një personi tjetër të identifikuar si Donald Kosta.
Gjykata e Vlorës e ka dënuar Hodon me 18 vite burg për veprat penale “vrasja me dashje” në bashkëpunim, “vrasja me dashje” e mbetur në tentativë dhe “plagosja e lehtë me dashje”. Ndaj këtij dënimi i ka mbetur për të vuajtur edhe 13 vjet, 6 muaj dhe 27 ditë burgim. Pritet ekstradimi i të riut në Shqipëri.
