Artan Myrtaj, 42 vjeç, i njohur edhe me nofkën “Tani i Rruzhdiut”, u ekzekutua në mes të Sarandës, ndërsa pas tij mbetet një seri ngjarjesh kriminale që lidhen me një konflikt të nisur për një pronë pranë bregdetit.
Myrtaj rezulton i përfshirë në një ngjarje plagosjeje të ndodhur në Sarandë më 17 korrik 2025, ku mbetën të plagosur dy të rinj nga Kamza, Gëzim Hajdaraj dhe Ernest Lame. Konflikti dyshohet se kishte në qendër një tokë pranë bregdetit, në lagjen nr. 1 të Sarandës, pranë zonës ku ndodhej “Copacabana Beach”.
Sipas dyshimeve të policisë, autor i plagosjes ishte Ramadan Canaj, i njohur edhe si Ramadan Zoto, ndërsa Artan Myrtaj, Klaus Jaçaj dhe Erjon Canaj dyshohet se e ndihmuan atë pas ngjarjes, si në kryerjen e krimit, ashtu edhe në largimin nga vendi.
Myrtaj u arrestua vetëm tri ditë pas plagosjes, më 20 korrik, nën akuzën e “përkrahjes së autorit të krimit”. Më pas, ai u la i lirë dhe ndaj tij u caktua masa e sigurisë “detyrim për paraqitje”. Në të njëjtën situatë u ndodh edhe Klaus Jaçaj, ndërsa Ramadan Zoto vijon të jetë në burg dhe Erjon Canaj është shpallur në kërkim.
Konflikti që u shndërrua në seri atentatesh
Pas plagosjes së dy të rinjve, në Sarandë nisën një sërë ngjarjesh të tjera kriminale, të cilat dyshohet se kanë lidhje me të njëjtin konflikt.
Më 22 korrik, vetëm pesë ditë pas plagosjes, makinës së Klaus Jaçajt iu vendos eksploziv. Dy ditë më vonë, më 24 korrik, Jaçaj u arrestua nga policia si një prej personave të dyshuar për përfshirje në plagosje.
Një muaj më pas, policia arrestoi në Korçë Ramadan Zoton, ndërsa ndaloi edhe Arben Ismailajn, i dyshuar se e kishte strehuar Zoton në Fier pas plagosjes.
Por konflikti nuk u ndal me shpërthimin e makinës së Jaçajt.
DINAMIKA/ Tani i Rruzhdiut u mbajt nën vëzhgim, vrasja të çon tek një plagosje në 2025
Tre muaj më vonë, ndërsa Klaus Jaçaj ndodhej ende në qeli, babai i tij, Isufi, u vra me eksploziv. Makina e 58-vjeçarit shpërtheu në momentin që ai tentoi të hipte në të, ndërsa automjeti ishte parkuar pranë pallatit ku banonte. Për këtë vrasje, deri më tani nuk ka persona të përballur me drejtësinë.
Një tjetër ngjarje e dyshimtë ndodhi rreth dy muaj më vonë në Ksamil. Një lokal i quajtur “Bumble Bee”, të cilin Ramadan Zoto e kishte dhënë me qira në qendër të qytetit, u përfshi nga flakët. Në atë kohë, policia nuk bëri të ditur një shkak për zjarrin dhe ngjarja vijon të mbetet e pazbardhur.
Në qendër të konfliktit, një pronë pranë “Copacabana Beach”
Në origjinë të përplasjes dyshohet se qëndron një konflikt për një tokë në bregdet, pranë “Copacabana Beach”, në lagjen nr. 1 të Sarandës.
Toka ishte në posedim të Gëzim Hajdarajt dhe Ernest Lames, dy të rinjve që u plagosën në korrik të vitit 2025. Sipas raportimeve mediatike, grupi nga Kamza, i lidhur me Ervis Lami, i njohur si “Vis Lami”, kishte ndërtuar në këtë pronë beach barin “Copacabana Beach”.
Më 14 maj, struktura u prish nga fadromat e IKMT-së, pasi ishte konstatuar se ishte ndërtuar pa leje.
Pas këtij episodi pati edhe zhvillime në strukturat e policisë lokale. Me urdhër të Skënder Hitës u shkri i gjithë Komisariati i Policisë së Sarandës, pas dyshimeve se efektivë të tij kishin favorizuar ndërtimin pa leje.
Në këtë klimë përplasjesh, plagosjesh, shpërthimesh dhe vrasjesh, Artan Myrtaj u ekzekutua në mes të Sarandës, duke shtuar një tjetër kapitull në një konflikt që prej më shumë se një viti ka prodhuar një seri ngjarjesh të rënda kriminale.
