Vodafone Albania ‘bie’ në jug! Prej ditësh pa sinjal

Prej disa ditësh, përdorues të Vodafone Albania kanë denoncuar probleme të vazhdueshme me mbulimin dhe sinjalin telefonik, veçanërisht përgjatë zonave bregdetare të jugut të vendit.

Shqetësimet janë raportuar në disa prej zonave më të frekuentuara gjatë sezonit turistik, përfshirë Borshin, Vlorën, Himarën, Sarandën dhe Ksamilin, ndërsa probleme me sinjalin janë raportuar edhe në Shëngjin, në veri të vendit.

Bëhet fjalë për një problem që prek përdoruesit e një prej kompanive më të mëdha të telefonisë celulare në tregun shqiptar. Sipas denoncimeve të qytetarëve, në zona të ndryshme ka pasur vështirësi në kryerjen dhe marrjen e telefonatave, si edhe probleme me shërbimet që kërkojnë lidhje të qëndrueshme me rrjetin celular.

Një ditë më parë, InfoNews raportoi gjithashtu për një tjetër problematikë të evidentuar në jug të vendit, ku sinjalet e rrjeteve greke kanë ndërhyrë në zonat pranë kufirit. Përdoruesve të Vodafone Albania u është shfaqur edhe mesazhi “Mirë se vini në Greqi”, duke krijuar shqetësim dhe konfuzion te abonentët.

Vodafone “njeh” Borshin si Greqi, skandali me valët, qytetarët: Gjithë ditën pa askes…

Megjithatë, edhe pas dy ditësh me probleme të përsëritura, deri më tani nuk ka pasur një reagim publik nga Vodafone Albania për situatën, as për shkaqet e problemeve dhe as për kohën se kur pritet të rikthehet normaliteti i shërbimit.

Problemet nuk janë kufizuar vetëm te telefonatat dhe interneti celular. Denoncime janë bërë edhe për pajisjet POS, të cilat përdoren gjerësisht nga bizneset për kryerjen e pagesave me karta. Në disa raste, problematikat me rrjetin kanë sjellë vështirësi në realizimin e transaksioneve, duke shtuar shqetësimet për bizneset, veçanërisht në zonat turistike ku fluksi i pagesave elektronike është i lartë.

Mbetet për t’u parë nëse Vodafone Albania do të japë një shpjegim zyrtar mbi problematikën dhe nëse do të ndërmarrë masa konkrete për normalizimin e shërbimit në zonat e prekura.