Vangjel Tavo, 2.5 mln € për stadiumin e ri, 10 muaj pasi i vjetri u shkatërrua për parkim
10 muaj pasi vendosi të shpenzojë rreth 6 milionë euro për shkatërrimin e stadiumit të Himarës dhe shndërrimin e tij në një parkim publik, Vangjel Tavo ka vendosur të shpenzojë mbi 2.5 milionë euro të tjera për ndërtimin e një stadiumi të ri. Bashkia jugore ka parashikuar të hapë garën për ngritjen e impiantit të ri sportiv në shtator të këtij viti dhe fondi limit është 250 milionë lekë të reja. Duke fryrë ndjeshëm faturën financiare, kryebashkiaku nuk ka shpjeguar se përse stadiumi duhej prishur për parkim e më tej të zhvendosej diku tjetër.
Në tetor të vitit 2025, Fondi Shqiptar i Zhvillimit dhe Bashkia e Himarës vendosën të shpenzonin rreth 6 milionë euro për shkatërrimin e stadiumit të qytetit dhe shndërrimin e tij në një parkim publik. Ndërkohë, vetëm 10 muaj më pas, kryebashkiaku i Himarës, Vangjel Tavo, ka vendosur të shpenzojë mbi 2.5 milionë euro të tjera për ndërtimin e një stadiumi të ri.
Bashkia jugore ka parashikuar të hapë garën për ngritjen e impiantit të ri sportiv në shtator të këtij viti dhe fondi limit është 250 milionë lekë të reja.
Pra, në total, deri më tani, vlera e rrokadës së këtyre dy investimeve shkon në rreth 8.5 milionë euro. Ligjërisht, Bashkia është përgjegjëse për menaxhimin lokal dhe ajo presupozohet se i ka idetë më të qarta për mënyrën se si duhet administruar territori. Megjithatë, shpenzimi i dyfishtë për të njëjtin objekt, pra shkatërrimi i stadiumit për parkim dhe ndërtimi i tij në një hapësirë tjetër, ngre pikëpyetje për mënyrën se si shpenzohen të ardhurat publike.
Varianti më i përshtatshëm dhe me kosto shumë më të ulëta mund të ishte rikonstruksioni i stadiumit aktual dhe ndërtimi i parkimit të nevojshëm, sidomos për sezonin turistik, në një hapësirë tjetër. Por kryebashkiaku Tavo e ka parë ndryshe situatën, natyrisht, duke fryrë ndjeshëm faturën financiare.
Në daljet e mëparshme publike, Tavo ka deklaruar se Himara ka nevojë për parkim dhe ndaj u vendos shkatërrimi i stadiumit. Më tej, ai ka deklaruar se do të ndërtohet një stadium i ri, në një zonë tjetër larg impiantit sportiv ekzistues, duke thënë se qyteti ka nevojë për terrene sportive.
Të dyja veprat publike, si parkimi, ashtu edhe stadiumi, janë të nevojshme për jetën e përditshme të qytetit. Ajo që nuk sqaron Vangjel Tavo është fakti se përse stadiumi duhej prishur për parkim e më tej të zhvendosej diku tjetër. Dhe, mbi të gjitha, Tavo nuk sqaron se sa do të ishte kostoja, nëse stadiumi sistemohej aty ku ishte dhe parkimi të ndërtohej diku tjetër.
