TIRANË- SPAK ka dhënë pretencën për ish-drejtorët e ARRSH, Evis Berberi dhe Gentian Gjyli. Prokuroria e Posaçme kërkoi dënimin me 6.8 vite burg për Evis Berberin për shkelje të barazisë në tendera (5 episode), korrupsion pasiv (6 episode) dhe pastrim parash (1 episod).
Bëhet fjalë për një nga dosjet për shkelje të barazisë në tendera apo ankande publike, kryer në bashkëpunim, lidhur me disa procedura prokurimesh.
Për Gentian Gjylin, po ashtu ish-drejtor i Autoritetit Rrugor Shqiptar, SPAK kërkon 1.6 vite burg për shkelje të barazisë në tendera (2 episode) dhe heqje të së drejtës për të ushtruar funksione publike për një periudhë 5-vjeçare.
Për Erald Elezin, ish-drejtor i KESH, SPAK kërkoi dënimin me 1.6 vite burg për shkelje të barazisë në tendera, ulet 1/3, dhe heqje të së drejtës për të ushtruar funksione publike për 5 vite.
Procesi ndaj tyre është me gjykim të shkurtuar.
Po ashtu, prokurori i SPAK, Dritan Prençi, lexoi konkluzionet përfundimtare edhe për 20 të pandehurit e tjerë të kësaj dosjeje. SPAK kërkoi dhe konfiskimin e parave të sekuestruara në banesën e Ervis Berberit.
Po ashtu, Valter Begaj po gjykohet me proces të zakonshëm, i ndarë nga të tjerët. SPAK kërkoi konfiskimin e shumave të parave që i janë sekuestruar më herët Evis Berberit, gjatë kontrollit të banesës.
Bëhet fjalë për shumat monetare: 15 mijë euro, 35 mijë paund dhe 1 milion lekë.