Operatori celular One Albania ka reaguar pas ndërprerjes së shërbimit që u raportua nga mijëra abonentë në mbrëmjen e 10 marsit në zona të ndryshme të vendit.
Në një mesazh drejtuar klientëve, kompania thekson se është e angazhuar në investime të vazhdueshme dhe në përmirësimin e rrjetit, ndërsa pranon se gjatë orëve të vona të asaj dite mund të ketë pasur ndërprerje të përkohshme të shërbimit.
“I nderuar pajtimtar, One Albania është e angazhuar në investimet e vazhdueshme dhe përmirësimin e rrjetit. Në orët e vona të datës 10 mars, ju mund të keni hasur ndërprerje të përkohshme të shërbimit. Në shenjë mirënjohje ju ofrojmë 50 minuta ndërkombëtare dhuratë që do t’ju aktivizohen në ditët në vijim”, thuhet në reagimin e One Albania.
Megjithatë, në këtë reagim kompania nuk jep asnjë shpjegim konkret për shkaqet e ndërprerjes së rrjetit që sipas raportimeve të qytetarëve preku një pjesë të madhe të vendit dhe la shumë përdorues pa mundësi për të kryer telefonata, për të përdorur internetin apo për të dërguar mesazhe.
Ndërkohë, reagimi i kompanisë vjen pas një vale të madhe ankesash në rrjetet sociale, ku qindra abonentë kërkuan sqarime dhe llogari për incidentin që shkaktoi probleme në komunikim për disa orë.
