Një inspektor i Inspektoratit Kombëtar të Mbrojtjes së Territorit (IKMT) në Kukës është arrestuar nga policia, pasi dyshohet se ka kërcënuar me jetë drejtorin e institucionit ku punonte.
Sipas burimeve zyrtare, inspektori i identifikuar si Defrim Haziraj reagoi pas vendimit të drejtorit të IKMT për të gjobitur djalin e xhaxhait të tij, i cili po kryente punime ndërtimi pa lejen përkatëse në zonën e Krenzës, Kukës.
Nga hetimet paraprake ka rezultuar se Haziraj ka shpërdoruar detyrën, duke mos marrë masa për ndalimin e gërmimit të tokës që po kryhej në mënyrë të paligjshme nga i afërmi i tij. Shkelja u konstatua nga drejtuesi i IKMT, i cili urdhëroi menjëherë inspektimin në terren dhe vendosjen e masave ndëshkuese ndaj ndërtuesit.
Vendimi nuk është pritur mirë nga inspektori, i cili dyshohet se ka kërcënuar drejtorin e IKMT, çka solli edhe ndërhyrjen e policisë dhe arrestimin e tij.
Ndërkohë, përveç arrestimit të inspektorit, policia ka proceduar penalisht edhe ndërtuesin, kushëri i tij, për shpërdorim të tokës dhe ndërtim pa leje.
Hetimet për këtë çështje vijojnë.