Në GJKKO është zhvilluar të hënë seanca e dytë e gjyqit në themel ndaj ish-presidentit Ilir Meta.
Gjatë seancës, prokurori i SPAK, Sotir Kllapi, lexoi një sërë komunikimesh telefonike që lidhen me një episod të dyshuar korrupsioni mes Metës, Monika Kryemadhi dhe biznesmenit Samir Mane.
Sipas SPAK, bëhet fjalë për ndryshime të pretenduara në ligjin për minierat, ku në këmbim dyshohet se është ofruar një vilë në kompleksin Rolling Hills. Prokurori deklaroi se nga bisedat e zbardhura rezulton se Kryemadhi i ka shkruar biznesmenit: “Te pallati a ke për ne?!”, ndërsa Mane i është përgjigjur: “Ka diçka më të mirë për ju te kompleksi Rolling Hills”.
Sipas akuzës, vila me numër 103 ishte përzgjedhur nga palët, ndërsa në telefonat e sekuestruar janë gjetur SMS, foto dhe komunikime mbi arredimin e pronës. SPAK pretendon se në projekt është përfshirë edhe një arkitekt italian, ndërsa arredimi i vilës është ndjekur nga Ema Çoku.
Në seancë u lexuan gjithashtu komunikime ku pretendohet se Meta kishte kërkuar që vila të ishte e pajisur edhe me sauna. Sipas SPAK, Kryemadhi kishte marrë përsipër të ndikonte për amendimin e ligjit të minierave, ndërsa propozimi në komision parlamentar është bërë nga deputetja Esmeralda Shkjau.
Prokuroria pretendon se amendimet janë reflektuar në ligj sipas formulimeve të diskutuara në SMS mes Manes, Kryemadhit dhe ish-deputetit Përparim Spahiu.
Organi i akuzës theksoi se kjo pasuri konsiderohet si përfitim i parregullt i lidhur me ndikimin në procesin ligjvënës për sektorin minerar. Ndërkohë, Ilir Meta dhe Monika Kryemadhi kanë mohuar vazhdimisht akuzat e ngritura ndaj tyre.
Si i shpetoi arrestimit Samir Mane?
Pas një hetimi disa-vjeçar ndaj Ilir Metes dhe Monika Kryemadhi, SPAK ngriti akuzat për korrupsion, pastrim parash dhe mosdeklarim pasurie. Prokuroria e Posaçme e akuzon ish-Presidentin për ndikime korruptive dhe përfitime monetare në çështjen CEZ-DIA, nga një marrëveshje interkoneksioni, si dhe për një marrëdhënie të dyshuar korruptive për ndryshimin e një ligji me porosi të biznesmenit Samir Mane, i cili sipas SPAK nuk është nën akuzë pasi çështja është parashkruar. Pikerisht parashkrimi i vepres penale qe dyshohet se Samir Mane ka konsumuar e ka shpetuar ate edhe nga ndonje mase sigurie per llogari te Prokurorise se Posacme SPAK.
“Si rezultat i marrëdhënies së krijuar, Ilir Meta dhe bashkëshortja e tij Monika Kryemadhi kanë pranuar propozimin e biznesmenit Samir Mane për të përfituar një vilë të ndërtuar në Kompleksin Rezidencial Rolling Hills,” shkruhet në masën e sigurisë të SPAK, një kopje e të cilës është siguruar nga BIRN. “Pasi ky fakt është marrë vesh edhe nga persona të tjerë, përfshirë Ambasadorin Grek në Tiranë, ata kanë hequr dorë nga përfitimi, duke mos e finalizuar marrëdhënien,” thekson organi i akuzës, ndërsa shton se “pavarësisht kësaj, ata e kanë pranuar premtimin.”
Sipas SPAK, kjo nuk ishte ndërhyrja e vetme e çiftit Meta-Kryemadhi në favor të interesave të Samir Manes. Nga komunikimet midis Monika Kryemadhit dhe Samir Manes, të pasqyruara në vendim, rezulton se ajo në shumë raste ajo ka ushtruar ndikimin e saj si deputete dhe si bashkëshorte e Ilir Metës për të zgjidhur probleme të ndryshme që biznesmeni ka pasur me administratën shtetërore dhe institucionet mbikëqyrëse të tregut – në mënyrë të veçantë me Agjencinë e Komunikimeve Elektronike dhe Postare (AKEP) dhe Përmbarimin Gjyqësor Shtetëror.
Ligji i minierave/ Spak: Samir Mane e bleu me vila! Kryemadhi shfajsohet: E firmosi edhe Edi Rama
Përveç vilës në Rolling Hills, Mane ka blerë një banesë në Qerret për 300 mijë euro në ‘cash’ nga Meta dhe Kryemadhi, një shumë që sipas SPAK nuk është deklaruar nga ish-presidenti në deklaratat periodike të interesave private në Inspektoratin e Kontrollit të Pasurisë (ILDKPKI). Ndërkohë, bashkëshortja e Manes dyshohet se ka financuar udhëtime dhe dreka në Paris dhe Londër, si dhe bileta koncerti për vajzat e Metës, Bora dhe Era.
Marrëdhënie ‘korrupsioni’
Samir Mane është një nga biznesmenët më të njohur dhe të suksesshëm në Shqipëri, i njohur për investimet e tij në sektorë të ndryshëm të ekonomisë. Ai është themelues dhe drejtues i grupit “Balfin”, një nga grupet më të mëdha të investimeve në rajon. Aktivitetet e tij përfshijnë ndërtimin e qendrave tregtare si TEG dhe QTU, zhvillimin e pasurive të patundshme me projekte si Rolling Hills, Green Coast dhe Vala Mar, investime në industrinë e minierave, teknologji dhe tregti pajisjesh elektroshtëpiake. Grupi “Balfin” ka gjithashtu investime në disa vende të tjera të Ballkanit, duke e bërë Manen biznesmenin më të pasur në Shqipëri.
Sipas SPAK, marrëdhënia e Manes me çiftin Meta dhe Kryemadhi shkon të paktën dy dekada pas. Në vitin 2007, Mane bleu një banesë nga ish-presidenti Meta në Qerret. Meta e kishte blerë banesën në vitin 2002 për 60 mijë USD dhe ia shiti Manes në vitin 2007 për 300 mijë euro në cash. Shuma e fituar nga shitja e banesës nuk u deklarua nga ish-presidenti në ILDKPKI në vitet 2007-2009. E njëjta banesë u rishit në vitin 2021 nga Mane gazetarit Baton Haxhiu për 80 mijë euro.
Në nëntor 2023, SPAK kreu kontrollin e banesës së nënës së Monika Kryemadhit dhe sekuestroi disa telefona celularë si prova materiale. Nga ekspertiza kompjuterike e një telefoni të përdorur nga Monika Kryemadhi në periudhën 2013-2014, SPAK evidentoi biseda të kryera mes Kryemadhit dhe personave të ndryshëm, përfshirë Samir Mane dhe Eva Mane, që ngritën dyshime për marrëdhënie korrupsioni mes tyre.