Altin Jani është larguar nga drejtimi i Drejtorisë së Sigurimit të Informacionit të Klasifikuar (DSIK). Në vendin e tij, sipas burimeve, është emëruar Ermal Jauri.
Jani kishte marrë drejtimin e DSIK-së në prill të vitit 2024, ndërsa më herët kishte mbajtur postin e drejtuesit të Sektorit të Sigurisë Industriale pranë këtij institucioni.
Deri më tani nuk janë bërë publike arsyet që kanë çuar në largimin e Janit nga detyra. Ndryshimi në drejtimin e institucionit vjen në një periudhë kur janë ngritur diskutime publike lidhur me procesin e pajisjes me certifikata sigurie të personelit (CSP), përfshirë vonesa, problematika në lëshim dhe raste të heqjes së certifikatave.Sipas burimeve, shkak për këtë lëvizje është bërë zvarritja e një numri të konsiderueshëm aplikimesh për pajisjen me certifikata sigurie, ku aplikuesve nuk u është kthyer përgjigje brenda afateve, ndërsa në raste të tjera nuk është marrë ende një vendim për pajisjen apo refuzimin e certifikatës.
Në të njëjtën kohë, emri i kreut të DSIK-së sipas raportimeve mediatike është përmendur edhe në kuadër të verifikimeve të Prokurorisë së Posaçme (SPAK) lidhur me çështjen e AKSHI-t, e cila është bërë publike pas denoncimeve të biznesmenit Gerond Meçe.
Pak ditë më parë, pas kërkesave të SPAK-ut dhe Policisë së Shtetit, DSIK raportohet se ka ndërmarrë masa për pezullimin dhe ngrirjen e certifikatave të sigurisë për disa subjekte që janë nën hetim nga SPAK-u. Mes tyre përmenden edhe persona të lidhur me grupin e dyshuar kriminal të përfshirë në çështjen e AKSHI-t.
DSIK luan një rol kyç në verifikimin e personave dhe në pajisjen e tyre me certifikata sigurie, të nevojshme për aksesin në informacionin e klasifikuar.
Emërimi i Ermal Jaurit shënon kështu një ndryshim në drejtimin e institucionit, ndërsa pritet që të bëhen të ditura më shumë detaje mbi arsyet e këtij vendimi.
