Rrit fitimet por INTERSIG Vienna Insurance Group ul dëmshpërblimet deri në 74% për aksidentet
Primet e sigurimit të detyrueshëm motorik gjatë vitit 2025 arritën në rreth 16.9 miliardë lekë, duke shënuar një rritje prej 12.22% krahasuar me vitin 2024. Kjo rritje tregon se kompanitë e sigurimeve kanë arkëtuar më shumë të ardhura nga siguracionet e detyrueshme që paguajnë qytetarët për automjetet e tyre.
Një nga kompanitë më të mëdha në tregun e sigurimeve të automjeteve, Intersig – Vienna Insurance Group, rezulton se gjatë vitit 2025 ka rritur primet e shkruara bruto në sigurimin motorik me 12%, duke reflektuar rritje të ndjeshme të të ardhurave.
Megjithatë, pavarësisht rritjes së fitimeve, të dhënat zyrtare të publikuara nga Autoriteti i Mbikëqyrjes Financiare (AMF) tregojnë se Intersig ka ulur dëmshpërblimet për sigurimin motorik. Sipas raportit të AMF-së, dëmshpërblimet e paguara nga kjo kompani për aksidentet rrugore janë ulur me rreth 15% gjatë vitit 2025.
Në nivel tregu, sipas AMF-së:
Produkti MTPL i brendshëm në vitin 2025 shënoi një rritje prej 13.32% të primeve të shkruara bruto, ndërsa numri i kontratave u rrit me 6.85% krahasuar me vitin 2024.
Produkti Karton Jeshil pati një rritje prej 8.19% të primeve, por numri i kontratave ra me 3.99%.
Sigurimi Kufitar shënoi një ulje prej 0.64% të primeve të shkruara bruto, ndërsa numri i kontratave u ul me 1.28%.
Për Kartonin Jeshil, tek Intersig, primet e shkruara bruto janë rritur me rreth 8% krahasuar me vitin 2024, çka do të thotë të ardhura më të larta për kompaninë. Por, në kontrast të fortë me këtë rritje, dëmshpërblimet e paguara për Kartonin Jeshil janë ulur me rreth 74%.
Të dhënat tregojnë se, ndonëse qytetarët kanë paguar më shumë për sigurimet e detyrueshme, kompanitë – dhe veçanërisht Intersig – kanë ulur ndjeshëm pagesat për dëmshpërblime, duke rritur kështu fitimet neto.
