Festivali i Pranverës ka rikthyer emocionet në skenën e RTSH-së, duke hapur siparin e një edicioni të ri që sjell një traditë të dashur për publikun shqiptar në një format më bashkëkohor.
Nata e parë e festivalit mblodhi në skenë 20 artistë konkurrues, të shoqëruar nga Orkestra Simfonike dhe bendi i RTSH-së. Mbrëmja u çel me interpretimin e veprës së njohur “Pranvera” të kompozitorit Antonio Vivaldi, e interpretuar nga Orkestra Simfonike e RTSH-së.
Moderatorët Bleona Qerreti dhe Nik Xhelilaj drejtuan mbrëmjen, duke përcjellë emocionet e rikthimit të festivalit pas më shumë se 20 vitesh mungesë.
Një nga momentet më të veçanta të natës ishte rikthimi në skenë i Ledina Çelos, fituese e dyfishtë e Festivalit të Pranverës, e cila interpretoi hitin e saj të njohur “San Valentino”.
Gjatë mbrëmjes u prezantuan edhe dy juritë që do të vlerësojnë artistët dhe do të përcaktojnë fituesin e këtij edicioni. Sipas formulës së votimit, 60% e rezultatit do të vijë nga Juria Profesionale dhe 40% nga Juria “Pranvera Digjitale”.
Emocione sollën edhe të ftuarit specialë. Këngëtari Bashkim Alibali, fituesi i parë i Festivalit të Pranverës, interpretoi këngën simbol “Në duart e nënës”, ndërsa artisti i njohur Luan Zhegu u nderua me çmimin e karrierës “Pranverë e Përhershme”, vlerësim që iu dorëzua nga maestro Zhani Ciko.
Në homazh të karrierës së tij, këngëtarja Kamela Islamaj interpretoi një nga këngët më të dashura të repertorit të Luan Zhegut.
Në përfundim të natës së parë, juria profesionale përzgjodhi 12 këngët finaliste që do të garojnë në natën finale të festivalit. Fituesi i Festivalit të Pranverës do të sigurojë automatikisht një vend në Festivalin e Këngës në RTSH, që zhvillohet në fund të vitit.
