Plagosja me armë në Shkodër, Pjerin Bitani qëlloi dy herë Vladimir Bruçin
Të tjera detaje janë zbardhur për plagosjen me armë zjarri të ndodhur këtë pasdite në Shkodër, ku mbeti i plagosur Vladimir Bruçi.
InfoNews ka siguruar foton e autorit të dyshuar. Ngjarja ndodhi rreth orës 14:30 në lagjen “Partizani”, pranë banesës së Bruçit.
Sipas të dhënave të publikuara deri tani, Pjerin Bitani dyshohet se ka qëlluar dy herë me armë zjarri ndaj tij, ndërsa më pas është larguar nga vendi i ngjarjes.
Shkak i përplasjes dyshohet të jetë një debat mes fqinjëve lidhur me kamerat e sigurisë, ndërsa policia e ka klasifikuar paraprakisht ngjarjen si të ndodhur për “motive të dobëta”.
Bruçi është transportuar në spital, ku po merr ndihmën mjekësore. Ndërkohë, shërbimet e policisë janë vënë në lëvizje për kapjen e autorit të dyshuar. Grupi hetimor, nën drejtimin e Prokurorisë, po punon për dokumentimin e plotë të rrethanave.
Vladimir Bruçi është një emër i njohur në kronikën e Shkodrës. Në vitin 2024 ai u dhunua brutalisht nga disa persona pas një konflikti për një vendparkimi. Për atë ngjarje, në mars të këtij viti, Gjykata e Shkodrës dënoi me burg tre persona: Izmir Sakicën, Samuel Troshanin dhe Arlind Kajoshin.
Hetimet vijojnë për të zbardhur nëse përplasja e sotme ka lidhje me konfliktet e mëparshme.
