Një tjetër qendër mashtrimi në formë call-centeri u zbulua në Tiranë, në kuadër të operacioneve kundër krimit kompjuterik.
Policia me ndihmën e emisionit Piranja kanë lokalizuar dhe goditur një ambient në zonën e Bërzhitës, ku kryhej mashtrimi i qytetarëve, kryesisht të huaj. Gjatë kontrollit në ambientin në pronësi ose admnistrim të Franc Korteshit, u konstatuan prova që sugjerojnë ushtrimin e aktivitetit të paligjshëm në formën e një call-centeri.
Call-centerat po largohen nga kullat e Tiranës në vilat periferike të kryeqytetit
Në fshatin Bërzhitë, në një resort mes gjelbërimit, është instaluar një call center mashtrues, me rreth 150 punonjës.
Dhe kamuflimi i këtij aktiviteti, ishte turizmi dentar në Shqipëri.
Pamjet e marra nga emisioni Piranjat
Kjo vilë ishte e ndarë në 15 ambiente zyrash, në të cilat operonin rreth 100 persona, mes operatorëve dhe konsulentëve financiarë.
Policia nga kontrolli në këtë ambient sekuestroi disa njësi kompjuterike dhe telefona celularë, të cilët do t’i nënshtrohen ekzaminimeve të specializuara për të zbuluar rolin dhe përdorimin e tyre në këtë skemë të dyshuar mashtrimi.
Po ashtu, hetuesit kanë zbardhur edhe mënyrën se si subjekti kishte tentuar të shmangte kontrollet.
Sipas dokumentave të siguruara nga VoxNews, ambienti rezultonte i regjistruar si biznes në fushën e turizmit mjekësor, çka dyshohet se përdorej si mbulesë për aktivitetin e paligjshëm.
Kush është “peshku” i madh që kishte call-center
Maskimi si biznes i ligjshëm dhe si ndodh mashtrimi i klientëve
Kompania regjistrohet si turizëm dentar, call-center shërbimi, ose marketing online dhe merr licenca formale që duken të rregullta në letër.
Punonjësit trajnohen për shitje dhe telefonojnë klientë jashtë Shqipërisë (Itali, UK, Gjermani dhe SHBA) ku prezantohen si “financial advisors” dhe përdorin skripte psikologjike për të bindur klientët të investojnë.
Klientëve u kërkohet, të hapin llogari në platforma të panjohura të depozitojnë para nga 100 euro, 100 mijë apo edhe më tepër në varësi të buxhetit që ka personi.
Në momentin kur klienti kërkon t’i tërheqë paratë, atij i i kërkohen tarifa shtesë, depozitë tjetër ose i mbyllet llogaria dhe paratë “zhduken”.
Çfarë ndodhi disa ditë më parë:
Kujtojmë se kjo ishte goditja e dytë brenda pak ditësh në Tiranë. Jo më larg se pak ditë më parë gjatë një aksioni në kryeqytet u goditën 3 qendra Call-Center.
Aksioni çoi në arrestimin e 7 personave dhe të tjerë të shpallur në kërkim.
Konkretisht 7 persona me masë ‘arrest me burg’, 2 në ‘detyrim paraqitje’ dhe ‘ndalim jashtë vendit’, si dhe 5 të tjerë të arrestuar në flagrancë.
Hetimet 2 vjeçare, kanë nisur në Austri, aty ku ishte kryer veprimtaria kryesore e mashtrimit dhe operacioni u bë bashkë me SPAK dhe Policinë e Shtetit.
Sipas hetimeve, kjo veprimtari u ka shkaktuar viktimave humbje që dyshohet se tejkalojnë 50 milionë euro.