Përkrah gjigandëve botërorë, Aeroporti Ndërkombëtar i Tiranës mes finalistëve për çmimin “Aeroporti i Vitit 2026”
Tiranë, gusht 2026 – Aeroporti Ndërkombëtar i Tiranës (TIA) është përzgjedhur mes finalistëve për çmimin “Aeroporti i Vitit 2026”, çmimi kryesor i Airport Honour Awards, organizuar nga International Airport Review.
TIA është një nga gjashtë aeroportet finaliste të këtij viti, përkrah aeroporteve të Nju Jorkut, Mynihut, Vjenës, Pittsburghut dhe Buenos Airesit.
International Airport Review është një platformë profesionale ndërkombëtare, e dedikuar industrisë së aeroporteve dhe aviacionit. Përmes Airport Honour Awards, ajo vlerëson arritjet dhe zhvillimet në sektorin aeroportual, ndërsa finalistët përzgjidhen përmes një procesi vlerësimi nga ekspertë dhe drejtues të industrisë së aviacionit.
Çmimi “Aeroporti i Vitit” vlerëson performancën e përgjithshme të aeroporteve në fusha kyçe si efikasiteti operacional, eksperienca e pasagjerëve, inovacioni dhe qëndrueshmëria.
Përzgjedhja e TIA-s mes finalistëve vjen pas një periudhe transformimi dhe rritjeje të konsiderueshme, falë investimeve të ndërmarra nga Grupi Kastrati në pesë vitet e fundit. Nga 3.3 milionë pasagjerë në vitin 2019, aeroporti kapërceu shifrën rekord prej 10.7 milionë pasagjerësh në vitin 2024, për të vijuar me 11.6 milionë në vitin 2025, ndërsa për vitin 2026 parashikohet që aeroporti t’u shërbejë rreth 13.3 milionë pasagjerëve.
Kjo rritje është shoqëruar me investime të vazhdueshme në infrastrukturë dhe kapacitete, përfshirë edhe investimet e realizuara gjatë vitit 2026. Terminali i pasagjerëve është trefishuar në madhësi, janë shtuar kapacitetet e reja të check-in-it dhe portat e reja të imbarkimit, ndërsa pista është zgjatur në 3,000 metra. Kapaciteti i pozicioneve të parkimit të avionëve është rritur nga 7 në 31 pozicione.
TIA ka investuar gjithashtu në teknologji dhe në përmirësimin e eksperiencës së pasagjerëve, përmes sistemeve biometrike të njohjes së fytyrës në kontrollin kufitar, teknologjive të avancuara të kontrollit të sigurisë, linjave të kalimit të shpejtë dhe atyre të dedikuara familjeve, si dhe përmirësimit të qarkullimit dhe hapësirave në terminal.
Në fushën e qëndrueshmërisë, TIA ka arritur Nivelin 3 – Optimization të Airport Carbon Accreditation dhe ka investuar mbi 5 milionë euro në iniciativa të qëndrueshmërisë. Projektet e energjisë së rinovueshme gjenerojnë rreth 5,700 MWh në vit dhe kanë kontribuar në reduktimin e 4,443 tonëve CO₂.
Sot, aeroporti lidhet drejtpërdrejt me rreth 120 destinacione përmes 60 kompanive ajrore partnere, duke forcuar rolin e tij në zhvillimin e turizmit, ekonomisë dhe lidhjen e Shqipërisë me tregjet ndërkombëtare.
Përzgjedhja në finalen e “Aeroportit të Vitit 2026” përfaqëson një vlerësim të rëndësishëm ndërkombëtar për Aeroportin Ndërkombëtar të Tiranës, duke e vendosur atë përkrah aeroporteve elitare dhe duke shënuar një tjetër moment të rëndësishëm për imazhin e Shqipërisë në industrinë globale të aviacionit.
