Pegasus dhe Labopharma, GJKKO lë në fuqi sekuestron e PROVAVE
GJKKO ka rrëzuar kërkesën e kompanisë Pegasus dhe Labopharma, në pronësi dhe aksione të lidhura me biznesmenin grek Janis Karathanos, për kthimin e provave materiale të sekuestruara gjatë hetimeve që po zhvillon SPAK mbi dyshimet për abuzime me tendera në fushën e shëndetësisë.
Sipas burimeve, në kuadër të hetimit penal ndaj Klodian Allejbeu dhe personave të tjerë të dyshuar për shkelje në procedurat e prokurimeve publike, organi i akuzës ka sekuestruar dokumentacion dhe materiale të konsideruara të rëndësishme edhe në ambientet e kompanisë PEGASUS dhe mbi 12 shoqërive të tjera tregtare.
Pas sekuestrimeve të provave në kompaninë e Karathanos, ky i fundit iu drejtua gjykatës me kërkesë për heqjen e masës së sekuestros dhe kthimin e materialeve. Ky hetim në SPAK ndiqet nga prokurore Dorina Bejko e cila është edhe shefja e njësisë kundër korrupsionit në SPAK. Kjo seancë ishte planifikuar të mbahej ditën e djeshme por u shty duke u shpallur vendimi të Premten më 20 shkurt 2026.
