Nuk ndalet SPAK! Këmba këmbës pas AKSHI-t, 25 dëshmi që fundosin Ermal Beqirin, Mirlindën dhe Gys Agasin
SPAK ka vijuar thellimin e hetimeve lidhur me çështjen e tenderave në Agjencia Kombëtare e Shoqërisë së Informacionit (AKSHI), duke zgjeruar ndjeshëm rrethin e personave të marrë në pyetje dhe provave të administruara në dosje.
Burime pranë hetimit bëjnë me dije se prokurorët kanë mbledhur dëshmi nga Daniel Shima, si edhe nga 25 punonjës dhe ish-punonjës të AKSHI-t, të cilët kanë dhënë të dhëna të reja mbi funksionimin e grupit të dyshuar kriminal brenda institucionit. Sipas informacioneve, dëshmitë e tyre kanë ndihmuar në zbardhjen e mekanizmit të brendshëm të procedurave të tenderimit dhe mënyrës se si, në disa raste, kriteret dyshohet se janë përshtatur për subjekte të paracaktuara.
SPAK mësohet se ka siguruar gjithashtu prova të reja materiale, përfshirë kontrata dhe dokumente të tjera zyrtare, që hedhin dritë mbi mënyrën e zhvillimit të procedurave të prokurimit dhe përzgjedhjen e fituesve. Në fokus janë raste ku tenderat dyshohet se janë orientuar drejt kompanive të caktuara, ndërsa subjektet e tjera janë skualifikuar në mënyrë të padrejtë.
Një kontribut të rëndësishëm në hetim kanë dhënë edhe kompanitë që pretendojnë se janë përjashtuar pa të drejtë nga garat për tendera pranë AKSHI-t, duke paraqitur dokumentacion dhe pretendime që, sipas burimeve, kanë ndihmuar në forcimin e provave për shkelje të barazisë në tendera.
Prokuroria e Posaçme Antikorrupsion ka reaguar zyrtarisht në datën 16 dhjetor 2025 në lidhje me urdhër-arrestet e lëshuara për drejtoreshën e AKSHI-t, Mirlinda Karçanaj, zëvendësen e saj Hava Delibashi, si dhe për disa zyrtarë e biznesmenë të tjerë. Në njoftimin zyrtar, SPAK i konsideron personat nën hetim si pjesë të një grupi të strukturuar kriminal.
Sipas SPAK, hetimet tregojnë se anëtarët e grupit kanë ndërhyrë në procedurat e tenderimit duke vendosur kritere të paligjshme për të favorizuar kompani të caktuara. Po ashtu, përmes presionit dhe formave të tjera të paligjshme, dyshohet se kanë detyruar përfaqësues të kompanive konkurrente të tërhiqen nga ankimimet, duke garantuar fitoren e subjekteve të paracaktuara.
SPAK sqaron se zyrtarët e dyshuar, në kuadër të grupit të strukturuar kriminal, kanë konsumuar elementë të veprës penale “Shkelje e barazisë së pjesëmarrësve në tendera apo ankande publike”, konkretisht në përcaktimin e kritereve specifike që nuk parashikohen në ligj dhe që kanë favorizuar disa kompani kundrejt të tjerave.
Gjithashtu, sipas SPAK, administratorë të disa kompanive dyshohet se kanë marrë pjesë formalisht në tendera, kanë lëshuar fatura fiktive dhe kanë kryer transaksione financiare në funksion të pastrimit të parave.
Masat e sigurisë të shpallura janë si më poshtë:
Ergys Agasi, biznesmen – “arrest me burg”
Ermal Beqiri, biznesmen – “arrest me burg”
Mirlinda Karçanaj – “arrest në shtëpi”
Hava Delibashi – “arrest në shtëpi”
Andis Papa – “ndalim për të dalë jashtë vendit”
Gëzim Hoxha – “ndalim për te dalë jashtë vendit”
Rogers Rryta – “ndalim për të dalë jashtë vendit”
Erion Ismaili, zëvendësdrejtor për Hetimin e Krimit në Policinë e Tiranës – “pezullim nga detyra” dhe “ndalim për të dalë jashtë vendit”
SPAK ka ekzekutuar gjashtë masa sigurie, ndërsa masat e arrestit me burg për Ergys Agasi dhe Ermal Beqiri nuk janë ekzekutuar ende. Hetimet vijojnë për të dokumentuar plotësisht strukturën e dyshuar kriminale dhe përgjegjësitë individuale të secilit person të përfshirë.
