Pas aksidentit tragjik që ndodhi tre ditë më parë në autostradën Egnatia në Greqi, janë zbardhur dëshmitë e para nga dëshmitarët okularë. Ngjarja la pas tre viktima shqiptare: Viktor Bushi, Klarenc Kacaj dhe Marianka Bushi (Aliraj), ndërsa një tjetër, Magdalena Kacaj, mbeti e plagosur.
“Dëgjonim tre personat duke u lutur t’i nxirrnim jashtë: ‘Na nxirrni jashtë, na shpëtoni’. Ishin të bllokuar dhe digjeshin të gjallë. Nuk mundëm t’i nxirrnim jashtë”, rrëfeu një dëshmitar, raporton Protothema. Ai shtoi se gomat filluan të shpërthenin dhe makina mori flakë shumë shpejt. “Filloi të bënte shumë shpërthime. Zjarri vinte nga kamioni, ishte i shpejtë dhe i fortë”, shtoi ai.
Ngjarja ka ndodhur kur shqiptarët që jetonin në Athinë po ktheheshin nga një dasmë në Xanthi. Kamioni u përplas fillimisht me makinën e tyre dhe më pas me një tjetër automjet ku ndodheshin një vajzë shtatzënë, bashkëshorti i saj dhe dy fëmijët e tyre, 4 dhe 6 vjeç. Hetimet për shkaqet e aksidentit janë në zhvillim.