Medaljen e artë në Matematikë! Bashkia Cërrik nderon kampionin e ri të shkencës
CËRRIK – Pas jehonës së madhe që suksesi i tij pati në rrjetet sociale dhe më gjerë, Bashkia e Cërrik priti sërish sot në ambientet e saj Lorisin, djaloshin që ngriti flamurin shqiptar në arenën ndërkombëtare duke fituar medaljen e artë në Matematikë dhe medaljen e bronztë në Kimi.
Ky vlerësim vjen pas arritjes së jashtëzakonshme të të riut, i cili jo vetëm përfaqësoi denjësisht qytetin e tij, por i solli Shqipërisë një tjetër moment krenarie në fushën e dijes dhe shkencës. Sipas njoftimit zyrtar, suksesi i Lorisit nuk konsiderohet thjesht arritje personale, por një fitore për gjithë komunitetin – për shkollën, mësuesit dhe çdo qytetar që beson në fuqinë e arsimit.
Me vendim të Këshillit Bashkiak, Bashkia ka konfirmuar se do të vazhdojë të qëndrojë pranë Lorisit në rrugëtimin e tij akademik, duke theksuar se mbështetja nuk duhet të jetë vetëm në momentin e duartrokitjeve, por në çdo hap drejt sukseseve të ardhshme.
Një mirënjohje e veçantë iu shpreh edhe mësueses së tij, Flutura Hoxholli, e cilësuar si një nga shtyllat kryesore të këtij suksesi, për përkushtimin dhe besimin e vazhdueshëm ndaj nxënësit të saj.
“Na bën krenar, Loris. Bashkia Cërrik do të jetë gjithmonë pranë atyre që nderojnë emrin e saj me punë, talent dhe përkushtim”, thuhet në reagimin zyrtar.
Ky është një tjetër dëshmi se investimi në arsim dhe mbështetja e talenteve të reja mbetet një nga prioritetet kryesore për komunitetin e Cërrikut.
