Një ngjarje e rëndë dhe tronditëse ka ndodhur në Malin e Llogarasë, ku 22 kuaj të lirë janë qëlluar me armë gjahu, duke shkaktuar një masakër të vërtetë mbi këto kafshë të pambrojtura.
Sipas denoncimeve të pronarëve dhe aktivistëve, katër prej kuajve kanë ngordhur menjëherë nga plagët e marra, një pjesa tjetër janë fshehur në pyll, disa prej të cilëve të plagosur dhe kanë nevojë urgjente për veteriner.
Deri më tani pronarët nuk kane arritur t’i lokalizojne kuajt, të cilët u larguan në pyll pasi në drejtim të tyre u qëllua me armë zjarri.
Pamjet e siguruara janë të rënda dhe tregojnë barbarinë e ushtruar ndaj një tufe kuajsh që lëviznin të lirë në zonën malore.
Sipas banorëve, ky nuk është rasti i parë që kafshët në këtë zonë goditen me armë, por masakra e fundit ka shkaktuar zemërim publik dhe thirrje për ndërhyrje urgjente nga institucionet.
Pronari i kuajve ka deklaruar se autoritetet janë njoftuar menjëherë pas ngjarjes, por deri tani nuk është marrë asnjë masë konkrete.
Aktivistët për mbrojtjen e kafshëve dhe komuniteti lokal kërkojnë hetim të plotë të rastit, ndëshkim për autorin dhe marrjen e masave ligjore për të mbrojtur kafshët e lira nga dhuna.
Ata theksojnë se mungesa e reagimit institucional vetëm sa inkurajon përsëritjen e akteve të tilla mizore.