Dy video thuajse identike, që shfaqin ambientet e rinovuara të Shërbimit të Kimioterapisë në Spitalin Onkologjik të Tiranës, janë publikuar paralelisht në faqet zyrtare të Ministrisë së Shëndetësisë dhe në rrjetet sociale të biznesmenit Samir Mane. Të dyja palët reklamojnë të njëjtin investim: poltronat e reja për pacientët që marrin trajtim kimioterapie.
Por kush e ka financuar realisht këtë ndërhyrje?
Dy ditë më parë, Ministrja e Shëndetësisë dhe Mirëqenies Sociale, Evis Sala, vizitoi ambientet e reja të Shërbimit të Kimioterapisë, duke prezantuar tre salla të dedikuara për trajtim, të cilat ofrojnë shërbim për rreth 100 pacientë në ditë. Vizita u shoqërua me mesazhe publike që e paraqisnin ndërhyrjen si pjesë të “transformimit të Onkologjikut”.
Sot, Kryeministri Edi Rama shpërndau një video nga i njëjti ambient, duke e nisur ditën me një mesazh publik në rrjetet sociale, ku theksonte se transformimi i Onkologjikut po vijon “nën kujdesin e ministres së shëndetësisë”.
Megjithatë, pas këtij komunikimi institucional, rezulton se investimi konkret për poltronat e reja nuk është financuar nga buxheti i shtetit, por nga Fondacioni Mane, i themeluar nga biznesmeni Samir Mane. Sipas burimeve zyrtare, fondacioni ka financuar 30 poltrona të rinj për Shërbimin e Kimioterapisë.
Një ditë pas vizitës së ministres, Samir Mane vizitoi personalisht ambientet e rehabilituara, duke publikuar të njëjtën video dhe duke theksuar kontributin e fondacionit të tij në përmirësimin e kushteve për pacientët onkologjikë.