Kush i vodhi fondet e IPARD? Përfituesit spiunojnë njëri-tjetrin, OLAF i jep të dhëna SPAK-ut
Më 28 shtator 2023, Prokuroria e Posaçme SPAK njoftoi nisjen e hetimeve lidhur me dyshimet për abuzime me fondet e programit IPARD, të administruara nga Ministria e Bujqësisë. Çështja vijon të jetë në hetim, ndërsa autoritetet konfirmojnë bashkëpunim të ngushtë me strukturat europiane kundër mashtrimit.
Në tetor 2025, ish-kreu i SPAK, Altin Dumani, e ngriti sërish çështjen në Kuvend, duke deklaruar se hetimet për fondet IPARD janë aktive dhe se po punohet ngushtë me OLAF.
“Është regjistruar një procedim penal për fondet IPARD. Çështja është në hetim dhe po bashkëpunohet ngushtë me OLAF”, u shpreh Dumani.
I pyetur nëse po hetohet ish-ministrja e Bujqësisë, Frida Krifca, Dumani deklaroi se “në atë procedim penal hetohet çdo person që dyshohet se ka kryer veprime të paligjshme”, pa përmendur emra konkretë.
Deri në këtë fazë, hetuesit po kryejnë verifikime dhe ende nuk ka persona të regjistruar zyrtarisht si të pandehur. Megjithatë, burime për InfoNews bëjnë me dije se pritet që së shpejti të ketë zhvillime të reja dhe emra konkretë që mund të përballen me akuza.
Mbi 20 persona janë marrë dhe pritet të merren në pyetje nga SPAK, ndërsa institucioni nuk jep detaje të mëtejshme për shkak të fazës paraprake të hetimit.
Mes personave të pyetur është edhe Reni Ashiku, administrator i Converse Management Consulting (CMC), i cili është paraqitur në SPAK për t’u marrë në pyetje lidhur me dyshimet për abuzim me fondet IPARD.
Ndërkohë, më 19 korrik të këtij viti, Bashkimi Evropian ka ndërprerë përkohësisht fondet për Shqipërinë në fushën e bujqësisë. Delegacioni i BE në Tiranë njoftoi se Komisioni Evropian ka marrë masa paraprake bazuar në informacionin fillestar të dhënë nga OLAF, pas një hetimi mbi akuzat për korrupsion në zbatimin e programit IPARD II.
Si masë parandaluese për mbrojtjen e interesave financiare të BE-së, Komisioni Evropian ka pezulluar përkohësisht rimbursimet ndaj autoriteteve shqiptare për shpenzimet e kryera në kuadër të programit IPARD II. Hetimi europian vijon, ndërsa nën kontroll janë projektet e financuara gjatë viteve 2014–2020 në Shqipëri.
