Agjencia Kombëtare e Shoqërisë së Informacionit (AKSHI) ka shpallur një tender të madh për shërbimin e ruajtjes fizike të ambienteve të saj në Tiranë, vetëm pak ditë pas lajmit për zhdukjen e ish-nëndrejtorit Daniel Shima.
Sipas dokumenteve të publikuara, objekti i kontratës është sigurimi me roje private në 16 vendroje, për një periudhë dyvjeçare. Fondi limit i tenderit arrin në rreth 3 milionë euro me TVSH, duke u kthyer në një nga kontratat më të mëdha të këtij institucioni.
Llogaritjet tregojnë se për periudhën 24-mujore, një vendroje do të kushtojë mesatarisht 17.8 milionë lekë, ndërsa pagesa mujore për çdo roje arrin në rreth 741 mijë lekë.
AKSHI, i njohur ndër vite për shpenzime të larta në fushën e teknologjisë së informacionit dhe për tendera publikë që shpesh kanë favorizuar kompani të caktuara, tashmë tërheq vëmendjen edhe për këtë shpenzim të lartë në ruajtjen fizike të ambienteve.
Ky tender vjen në një kohë kur institucioni është në qendër të debateve, pas zhdukjes për 10 orë të ish-nëndrejtorit Daniel Shima, i cili më pas u gjet dhe deklaroi largimin me dëshirë. Megjithatë, raportimet mbi shkaqet e zhdukjes, përfshirë aludimet për vizita në Shijak dhe Borsh, kanë ngritur pikëpyetje të shumta.
