Kryemadhi nxjerr SMS-të me Ramën: Duhet mbyllur shpejt….
Prokuroria e Posaçme ka kërkuar marrjen në pyetje të dhjetëra dëshmitarëve në procesin gjyqësor ndaj ish-presidentit Ilir Meta dhe ish-deputetes Monika Kryemadhi.
Kërkesa është depozituar në gjykatë, por ende nuk ka një vendimmarrje nëse dëshmitarët e propozuar nga SPAK do të thirren gjatë shqyrtimit gjyqësor.
Në listën e personave që SPAK kërkon të merren në pyetje janë Jozef Hajse, Ervis Mataj, Ardian Shatku, Pirro Xhixho, Ema Çoku, Esmeralda Shkjau, Kastriot Ismailaj, Vojsava Ismailaj, Milena Harito, Përparim Spahiu, Sokol Hysenaj, Majlind Lazimi, Agron Çela, Luan Rama, Endrit Brahimllari, Petrit Vasili, Spartak Braho, Ilir Kulla, Nasip Naço, Vangjel Tavo, Lindita Troka, Baton Haxhiu, Erjol Brahimllari, Damian Gjiknuri dhe Ralf Gjoni ndërsa më herët janë pyetur Marin Gjonaj dhe zyrtarë të lartë publik.
Procesi ndaj Metës dhe Kryemadhit lidhet me akuzat për korrupsion, pastrim parash dhe fshehje pasurie. Në fokus të dosjes janë çështja CEZ-DIA dhe kontratat e lobimit në Shtetet e Bashkuara të Amerikës.
Pjesë e procesit janë edhe të pandehur të tjerë. Fatima Kryemadhi dhe Ema Çoku akuzohen për pastrim parash, ndërsa Pirro Xhixho është i pandehur për korrupsion.
Këtë të enjte, Monika Kryemadhi doli nga ambientet e SPAK, ku foli para gazetarëve për materialet hetimore që, sipas saj, i janë vënë në dispozicion. Ajo u ndal veçanërisht te komunikimet telefonike të përfshira në dosje, duke pretenduar se një pjesë e akuzave mbështeten në mesazhe të nxjerra nga konteksti.
Kryemadhi deklaroi se komunikimet e saj janë interpretuar në mënyrë të gabuar dhe se në asnjë rast nuk ka pasur biseda me ish-kreun e AKEP-it, Pirro Xhixho, lidhur me pretendimet e SPAK për korrupsion apo shpërdorim detyre.
Ajo lexoi para mediave edhe disa mesazhe të shkëmbyera me kryeministrin Edi Rama në tetor të vitit 2014, të cilat, sipas saj, kishin të bënin me procesin e rilicencimit të AMC-së dhe çështje që lidhen me funksionimin e AKEP-it.
“Në një nga mesazhet i shkruaj Edi Ramës: ‘E di që je i lodhur, por më thotë Pirro se duhet me e mbyll me bordin e vjetër. Nesër nëse mundesh me e zgjidh, por të jenë të dy bashkë edhe Ahmetaj edhe Milena, që të rrinë në një fjalë se bëhet rrëmujë’”, tha Kryemadhi.
Në një tjetër mesazh të lexuar prej saj, Kryemadhi përmendi edhe raportin personal dhe politik me kryeministrin.
“Plus, siç e di ti, pavarësisht çudive që na kanë ndodhur e ia kemi bërë njëri-tjetrit, ne të dyve na bashkon shija, shija dhe shija. Është çudi më vete”, citoi ajo nga komunikimet e përfshira në dosje.
Ish-deputetja tha se mesazhet janë përdorur në mënyrë selektive dhe se, sipas saj, nuk provojnë akuzat e ngritura nga Prokuroria e Posaçme.
“Jam kënaqur me këto mesazhe. Sa shumë i paskam dashur. I paskam ruajtur se paska pasur shumë gjëra të bukura”, u shpreh Kryemadhi para gazetarëve.