TIRANË – Zyrtarë të FBI-së dhe ekspertë të sigurisë nga SHBA-ja dhe Europa kanë mbërritur në Tiranë, ku për pesë ditë do të zhvillojnë takime dhe diskutime me drejtues të institucioneve shqiptare të zbatimit të ligjit.
Nga 19 deri më 23 shtator, kryeqyteti shqiptar është mikpritës i takimit të 42-të të Kapitullit Europian të FBI National Academy Associates (FBINAA), i cili këtë vit zhvillohet nën temën “Building International Partnerships – Combating Organized Crime for a Safer Environment”.
Kë po kërkojnë? FBI zbarkon në Tiranë
Konferenca synon të shërbejë si një forum për forcimin e bashkëpunimit mes agjencive ligjzbatuese, shkëmbimin e informacionit dhe ekspertizës, si dhe diskutimin e metodave të reja për përballimin e krimit të organizuar dhe kërcënimeve të sigurisë.
Hapja zyrtare e aktivitetit është parashikuar për 21 shtator. Në axhendë janë përfshirë drejtues të lartë të institucioneve shqiptare dhe amerikane, mes tyre Zëvendësdrejtori Ndihmës në selinë qendrore të FBI-së, Spencer Horn, FBI Law Enforcement Attaché në Legatën e SHBA-së në Sofje, Brendan Collins, si dhe përfaqësues të Policisë së Shtetit, SPAK-ut, BKH-së dhe Prokurorisë së Përgjithshme. Pjesë e aktivitetit pritet të jetë edhe Presidenti Ndërkombëtar i FBINAA, Jim Gallagher.
Një pjesë e diskutimeve do t’u kushtohet formave të reja të veprimtarisë kriminale dhe përdorimit të teknologjisë nga grupet kriminale. Stephanie Stevens, FBI Assistant Law Enforcement Attaché në Berlin, do të prezantojë mbi hetimin e rrjeteve të komunikimit të koduar të përdorura nga organizatat kriminale.
Në fokus do të jetë edhe grupimi online “764”, të cilin autoritetet amerikane e kanë lidhur me forma të ekstremizmit të dhunshëm dhe aktivitete kriminale në internet. Një tjetër temë e programit është administrimi i pasurive të sekuestruara dhe konfiskuara dhe mundësia e përdorimit të tyre për qëllime publike.
Konferenca do të trajtojë gjithashtu rëndësinë e inteligjencës financiare në goditjen e strukturave kriminale, ndërsa pjesëmarrësit do të njihen edhe me raste konkrete hetimore të zhvilluara në Shqipëri.
Një prej tyre lidhet me hetimet në fushën e narkotikëve dhe do të prezantohet nga hetuesi i Byrosë Kombëtare të Hetimit, Eduart Kaloshi. Në axhendë janë parashikuar edhe prezantime mbi një tjetër hetim të suksesshëm të BKH-së, si dhe diskutime mbi zhvillimet e fundit të grupeve kriminale dhe mënyrën se si strukturat ligjzbatuese po i përgjigjen këtyre fenomeneve.
Në aktivitet do të marrin pjesë edhe përfaqësues shqiptarë të EUROPOL-it, me fokus te tendencat e reja të kriminalitetit dhe forcimi i koordinimit ndërkombëtar.
Takimi në Tiranë zhvillohet në një moment kur bashkëpunimi ndërkufitar, shkëmbimi i informacionit dhe përdorimi i teknologjisë në hetime janë bërë pjesë gjithnjë e më e rëndësishme e punës së agjencive ligjzbatuese.
