“Janë të shëndetshëm…”/ Ankandi i radhës, shiten viçat e sekuestruar

DIBËR – Gjashtë viça të sekuestruar në qarkun e Dibrës janë nxjerrë në ankand nga Agjencia e Administrimit të Pasurive të Sekuestruara dhe të Konfiskuara.

Sipas njoftimit zyrtar, kafshët kanë një peshë totale prej rreth 1,675 kilogramësh dhe ndodhen në Pesjakë, Maqellarë, Dibër.

Pasuria është sekuestruar në cilësinë e provës materiale dhe tashmë është vendosur për shitje përmes procedurës së hapur të ankandit. Vlera fillestare e përcaktuar për gjashtë viçat është 854,250 lekë, pa TVSH.

Për të marrë pjesë në ankand, ofertuesit duhet të paraqesin një garanci ose mandat-pagesë në masën 10% të vlerës fillestare. Ankandi ishte parashikuar të zhvillohej më 6 gusht.

Nxjerrja në ankand e kafshëve të sekuestruara rikthen në vëmendje mënyrën se si shteti administron pasuritë që vendosen nën sekuestro. Krahas procedurave të shitjes, ngrihet edhe diskutimi nëse pasuri të tilla mund të përdoren në forma të tjera, duke sjellë përfitim për familjet në nevojë.

Rasti i gjashtë viçave është i dyti i këtij lloji në Dibër, pas ankandit të 31 deleve të sekuestruara një vit më parë.