Pronari i kompanisë “FIRST” sh.p.k, Gëzim Hoxha, është sipas SPAK një ndër aktorët e mega skandalit të abuzimit me qindra milionë euro të fondeve të AKSHI-t, i cili kishte shërbyer si pjesë e rrjetit të kompanive të Ergys Agasit dhe Ermal Beqirit për të orientuar tenderët te personazhet që ishin pranë tyre, duke prishur konkurrencën dhe duke rritur fondet limit me qëllim përfitimin e shumave të mëdha parash përmes kësaj skeme.
Për shkak të fakteve të gjetura nga shqyrtimi i dosjeve të tenderëve dhe dëshmive të punonjësve, përfshirë edhe atë të Daniel Shimës, prokurori Bledar Maksuti i kërkoi GJKKO-së masën “ndalim i daljes jashtë shtetit” deri në përfundimin e hetimeve, pasi gjatë hetimit mund të gjenden fakte të reja.
Megjithatë, kjo nuk e ka ndalur Gëzim Hoxhën të marrë tenderë të tjerë publikë.
SKYWEB.AL ka konsultuar dokumentacionin e tenderit “Auditim dhe mirëmbajtje për Sistemin e Menaxhimit të Sigurisë së Informacionit (ISMS) në KQZ”, ku rezulton se kompania “FIRST” sh.p.k është shpallur fituese, edhe pse ka bërë ofertën më të lartë.
Bëhet fjalë për një nga tenderët e Komisionit Qendror të Zgjedhjeve, me objekt “auditim dhe mirëmbajtje për sistemin e menaxhimit të sigurisë së informacionit (ISMS) në KQZ”.
Kjo kompani ka ofruar 12,280,700 lekë pa TVSH, ndërsa në garë ka qenë edhe një kompani tjetër e quajtur “Idealdevs Corporation”, e cila ka ofruar 9,999,900 lekë me TVSH, por është skualifikuar me argumentin se nuk përmbush kriteret për përvojë të ngjashme .
Në procedurë ka marrë pjesë edhe kompania “SINTEZA CO”, e cila nuk ka paraqitur ofertë ekonomike dhe është skualifikuar .
Kështu, në fund të procedurës, kompania “FIRST” është shpallur fituese me ofertën më të lartë nga ato të vlefshmet .
Rezulton se Gëzim Hoxha është vëllai i Ferit Hoxhës, ministrit të Jashtëm të Shqipërisë.
Sipas të dhënave të siguruara nga SKYWEB.AL, ai ka një raport të ngushtë me kupolën drejtuese të KQZ-së, pasi në një procedurë tjetër, për të cilën SKYWEB.AL ka raportuar më herët, Sekretarja e Përgjithshme e KQZ-së, Jona Josifi, dyshohet se ka bërë një shkelje ligjore duke vlerësuar me pikë maksimale ofertën e kompanisë “Intellisoft”, me pronar Hoxhën, pa qenë anëtare e Komisionit të Vlerësimit të Ofertave.
Kjo çështje është aktualisht në shqyrtim në KPP dhe SKYWEB.AL do të vijojë ndjekjen e saj.
Ka të dhëna se pas kompanisë që në letra mban emrin e Gëzim Hoxhës fshihen familjarë të drejtuesve të KQZ-së, ku tashmë dyshohet se “nderi” te “Intellisoft” po shpërblehet me një tjetër tender për kompaninë “FIRST”.
Gëzim Hoxha te skandali AKSHI
Në dosjen e AKSHI-t detajohet edhe dëshmia e vetë Gëzim Hoxhës, i cili ka deklaruar se kompania e tij ka përfituar procedura prokurimi me vlera të larta, përfshirë edhe një tender prej rreth 60 milionë eurosh .
Sipas kësaj dëshmie, ai ka pasur bashkëpunim me kompani të tjera dhe ka qenë pjesë e një mekanizmi që përfshinte përfitimin e fondeve publike përmes procedurave të dyshuara si të paracaktuara .
Në të njëjtën dosje thuhet se “Gëzim Hoxha ka rol aktiv në pjesëmarrjen dhe përfitimin e paligjshëm të procedurave të prokurimit, të cilat diktohen nga shtetasit e sipërpërmendur. Ai ka kredituar shuma të konsiderueshme” .
Gëzim Hoxha po ashtu ka regjistruar te parajsa fisjale Duran Tech Park kompani si “CyberMind Labs” dhe “Box Artificial Logic”, ndërsa në të njëjtën skemë janë përfshirë edhe aktorë të tjerë të lidhur me dosjen e AKSHI-t .
Plani i grupit të AKSHI-t ishte të transferonin paratë te kompanitë e reja të hapura te Durana Tech Park me qëllim shmangien e taksave.
