Hita mbledh Drejtorët e Policisë: Porosia e prerë që kam për ju…
Drejtori i Përgjithshëm i Policisë së Shtetit, Skënder Hita, ka kërkuar rritje të vigjilencës ndaj rasteve të kultivimit të kanabisit në ambiente të mbyllura, gjatë një takimi me drejtuesit e qarqeve.
Sipas burimeve, Hita e ka cilësuar të papranueshme tendencën në rritje të këtij fenomeni, duke theksuar se strukturat e policisë duhet të shtojnë kontrollin e territorit, të monitorojnë ambientet me risk dhe të mbajnë nën vëzhgim kontigjentin kriminal.
Ai ka paralajmëruar se toleranca ndaj rasteve të tilla do të jetë zero, jo vetëm për personat e përfshirë në kultivimin e lëndëve narkotike, por edhe për përgjegjësit në radhët e zyrtarëve policorë që nuk reagojnë në kohë.
Në këtë kuadër, Hita ka kërkuar gjithashtu një bashkëpunim më të ngushtë me Operatori i Shpërndarjes së Energjisë Elektrike (OSHEE), për të identifikuar rastet e dyshuara përmes konsumit të pazakontë të energjisë elektrike, që shpesh lidhet me kultivimin e kanabisit në ambiente të mbyllura.
Policia e Shtetit pritet të intensifikojë kontrollet në të gjithë territorin, ndërsa strukturat vendore janë udhëzuar të raportojnë dhe të ndërhyjnë menjëherë ndaj çdo rasti të dyshuar.
