Hetimet për mbetjet e Kurum, Italia: Janë të rrezikshme dhe toksike
Materiali i depozituar në 102 kontejnerët e kishte origjinën nga uzina e çelikut Kurum International në pronësi turke në Elbasanin e Shqipërisë qendrore, sipas raporteve të mediave shqiptare.
Mbetjet u blenë fillimisht nga kompania shqiptare Sokolaj, e cila më pas ia shiti materialin filialit të saj në Kroaci, GS Minerals, me ngarkesën që do të shkarkohej në Tajlandë për përpunim.
Sipas dokumenteve të parë nga AFP, Sokolaj i etiketoi mbetjet si “oksid hekuri” — një substancë që nuk është e ndaluar për dërgesë dhe që nuk konsiderohet e rrezikshme.
Një analizë e substancës në kontejnerë u krye nga një laborator kroat me bazë në Zagreb, sipas Sokolajt.
Gazetarja Klodiana Lala, e ftuar në emisionin “Të Paekspozuarit” në MCN TV, ka folur për hetimet e Prokurorisë lidhur me mbetjet e kompanisë Kurum, të cilat u kthyen me anije në Shqipëri.
Lala bëri të ditur se përgjigjja nga laboratori në Itali ka mbërritur dhe ka konfirmuar se mbetjet rezultojnë të rrezikshme.
Sipas saj, tashmë i takon Prokurorisë së Durrësit të përcaktojë përgjegjësit që kanë lejuar eksportimin e këtyre mbetjeve.
Pas një zvarritje të gjatë, Prokuroria e Durrësit, dërgoi mostrat e konteinerëve jashtë vendit, të cilat ruhen në Porto Romano.
Nga informacionet që disponoj, më rezulton se përgjigja nga laboratori në Itali ka ardhur dhe mbetjet kanë rezultuar të rrezikshme.
I takon Prokurorisë së Durrësit të përcaktojë personat përgjegjës, që kanë lejuar eksportimin e mbetjeve. Nuk bëhet fjalë vetëm për këtë sasi që mbahet e bllokuar, por në dokumentat që kam parë, që janë publike, më rezultojnë tonelata mbetje të rrezikshme të eksportuara jashtë vendit.
Nuk bëhet fjalë vetëm për Kurum, por po ashtu duhet parë edhe një sërë kompanish të tjera.
102 kontejnerët në Porto Romano, janë eksportuar nga kompania Sokolaj shpk në pronësi të Xhovana Sokolaj, e cila ka patur qëndrime të ndryshme në Prokurori. Duhet parë rrjeti i kompanive të tjera dhe roli i zyrtarëve. Nuk përfshihet vetëm Kurum dhe kompani të tjera, kam dyshime të forta, që ka të përfshirë zyrtarë të lartë shtetërore.
