Gol 8 mijë euro, shoqja mashtron Kejvina Kthellën! Merret e pandehur kryeinspektore Anela Osmani
Modelja Kejvina Kthella ka rënë pre e një mashtrimi financiar, pasi shoqja e saj, Anela Osmani, dyshohet se i ka marrë një shumë prej 8 mijë eurosh dhe nuk ia ka kthyer.
Anela Osmani, me origjinë nga qyteti i Gramshit, është proceduar nga Prokuroria e Tiranës për veprën penale të “Mashtrimit”, pasi dyshohet se ka marrë në mirëbesim shumën prej 8 mijë eurosh nga modelja Kejvina Kthella.
Gazetari Elton Qyno ka mësuar se rasti është denoncuar në Policinë e Tiranës në fillim të muajit maj 2026, ndërsa më 7 maj materiali hetimor ka mbërritur në prokurori për veprime të mëtejshme.
Prokurori i çështjes, Bledar Valikaj, ka kërkuar masën e sigurisë “Detyrim për paraqitje” për Anela Osmanin, duke argumentuar se ajo ka konsumuar veprën penale të “Mashtrimit”, sipas paragrafit të parë, pa kaluar në rrethana që sjellin pasoja të rënda.
Nga ana tjetër, avokatët mbrojtës kanë pretenduar se në rastin konkret nuk ka konsumuar vepër penale. Në përfundim të seancës gjyqësore, Gjykata e Shkallës së Parë Tiranë vendosi caktimin e masës së sigurisë “Detyrim për paraqitje” për Anela Osmanin.
Sipas kallëzimit të bërë nga Kejvina Kthella në polici, shumën prej 8 mijë eurosh ajo e kishte kursyer nga të ardhurat e saj nga puna. Këtë shumë ia kishte lënë në ruajtje shoqes së saj të lagjes, Anela Osmani, pasi vetë Kthella do të udhëtonte drejt banesës së të afërmve të saj në Lezhë.
Meqenëse në banesën e saj në Tiranë do të shkonte pastruesja, Kejvina Kthella kishte vendosur që paratë t’i hiqte nga banesa dhe t’ia jepte në ruajtje shoqes së saj, Anela Osmanit.
Sipas kallëzimit, Osmani e ka marrë shumën prej 8 mijë eurosh, por nuk ia ka kthyer as më vonë, çka ka çuar në nisjen e procedimit penal nga Prokuroria e Tiranës për veprën penale të “Mashtrimit”.
Fillimisht, Anela Osmani dyshohet se është justifikuar para Kejvina Kthellës duke i thënë se paratë i kishte vendosur në kasafortë, por nuk mund ta hapte atë pasi kishte harruar kodin.
Pas këmbënguljes së Kejvinës, Osmani ka hapur kasafortën, por sipas pretendimeve të saj, paratë nuk ndodheshin aty.
Më pas, Anela Osmani ka dhënë një tjetër shpjegim, duke pretenduar se shumën prej 8 mijë eurosh e kishte depozituar në llogarinë e saj bankare. Sipas saj, llogaria ishte bllokuar nga përmbarimi dhe për këtë arsye nuk mund të kryente veprime për tërheqjen e parave.
Pas këtyre pretendimeve, Kejvina Kthella iu drejtua Policisë së Tiranës, ku depozitoi kallëzim penal ndaj shoqes së saj, Anela Osmani.
Osmani u arrestua nga policia dhe pak ditë më parë doli para Gjykatës së Tiranës, ku u njoh me masën e sigurisë “Detyrim për paraqitje”.
