Gjurmimi…Rosmann & Lala shiti qumësht toksik për fëmijët
Një alarm për qumështin për foshnja të prodhuar nga Nestlé ka ngritur shqetësim në disa vende të Evropës.
Autoritetet shëndetësore në Mbretërinë e Bashkuar kanë konfirmuar se 36 foshnja janë sëmurë pasi kanë konsumuar formulën e kontaminuar me toksinën cereulide. Ndërkohë, në Francë ka nisur një hetim për vdekjen e dy foshnjave që dyshohet se lidhet me të njëjtin produkt.
Ky qumësht është tregtuar edhe në Shqipëri. Produkti është importuar nga subjekti Rossmann & Lala dhe është shitur në rrjetin e dyqaneve të kësaj kompanie.
Nga kjo sasi:
462 kuti janë rieksportuar në Kosovë
836 kuti janë bllokuar nga autoritetet
580 kuti rezultojnë të shitura në treg
Çdo kuti ka peshë 800 gram.
Pas kontrolleve, AKU ka gjobitur subjektin Rossmann & Lala për dy shkelje kryesore:
Mangësi në sistemin e gjurmueshmërisë së produkteve
Mospërmbushje të detyrimeve të Operatorëve të Biznesit Ushqimor
Sipas ekspertëve, mungesa e gjurmueshmërisë është një problem serioz për sigurinë ushqimore. Në raste të tilla autoritetet nuk mund të identifikojnë shpejt:
ku janë shpërndarë produktet
sa njësi janë shitur
dhe ku duhet të bëhet tërheqja nga tregu.
TV Ora News kërkoi një reagim zyrtar nga Rossmann & Lala për këtë çështje.
Subjekti nuk dha një përgjigje zyrtare, por i kërkoi gazetares Alketa Çeku të vizitonte pikat e shitjes ose zyrën qendrore. Kjo ftesë u refuzua, pasi qëllimi ishte marrja e një qëndrimi zyrtar për publikun.
Rasti rikthen në vëmendje rëndësinë e sigurisë ushqimore, veçanërisht kur bëhet fjalë për produkte të ndjeshme si ushqimi për foshnja.
