Fania i Beratit: Një grup killërash në Shqipëri kryenin vrasje për llogari të Kryeministrit dhe ministrit të Brendshëm
Personazhi i njohur i botës së krimit në Berat, i njohur si “Fania”, po tenton të bllokojë ekstradimin nga Britania e Madhe drejt Shqipërisë, duke pretenduar se jeta e tij është në rrezik nga një atentat i dytë i mundshëm.
Bëhet fjalë për Irfan Azizin, i cili u paraqit në Westminster Magistrates’ Court, ku kundërshtoi ekstradimin, duke deklaruar se nëse kthehet në Shqipëri do të vritet.
Irfan Azizi, tha se grupi kriminal që tentoi ta vriste “kryen gjithashtu atentate për gjyqtarë dhe politikanë” dhe do të kërkonte hakmarrje nëse ai kthehet në Shqipëri.
36 vjeçari po kërkon azil në Mbretërinë e Bashkuar së bashku me bashkëshorten e tij, ndërsa më parë ata janë strehuar në një hotel të financuar nga taksapaguesit.
Dje, Gjykata e Magjistraturës në Westminster dëgjoi se Azizi kërkohet në Shqipëri për të vuajtur një dënim me një vit burg, pasi është dënuar në mungesë.
Gjatë një shkëmbimi të çuditshëm, Azizi pranoi se ai kishte paguar tashmë gjyqtarin shqiptar për ta mbyllur çështjen dhe sugjeroi se kjo do të thoshte se ai nuk ishte më një person në kërkim.
Të dhënat e gjykatave britanike tregojnë se Azizi dhe një tjetër shqiptar u dënuan secili me nga gjashtë muaj burg në Gjykatën e Kurorës në Swindon në prill 2025 për posedim të patentave gjermane të falsifikuara.
Azizi ka gjithashtu një histori të gjatë kriminale në Shqipëri, përfshirjen në lojërat e fatit.
Në shkurt 2019, ai u dënua me dy vite burg për vjedhje, përpara se të merrte një dënim shtesë prej dy vitesh e tre muajsh në qershor për vjedhjen e një Mercedes-Benz B-Class.
Por vetëm pesë muaj më vonë ai ishte i lirë dhe përsëri në rrugë, tentativa për vrasjen e tij ndodhi më 29 nëntor 2020. Ai e përshkroi se pa një automjet që u ndal jashtë një pike karburanti, përpara se një person i armatosur të dilte duke mbajtur një kallashnikov.
“Ata filluan të qëllonin drejt meje, rreth 30 plumba,” i tha ai Gjykatës së Magjistraturës në Westminster. “Një plumb më goditi dorën, e cila u thye në 13 vende.”
Organizatori i atentatit është raportuar si Talo Çela, një ish-mik i afërt i Azizit, i cili aktualisht është një nga kriminelët më të kërkuar në Shqipëri.
Çela dyshohet se ka lidhje me bandën kriminale Çopja, një furnizues i madh i kokainës për Londrën.
Azizi, djali i një fermeri, tha se u largua nga Shqipëria me autobus pesë javë pas atentatit, duke mbërritur në Britani disa ditë më vonë.
Ai qëndroi me miq dhe një kushëri, përpara se në shtator 2021 të zhvendosej në Sheffield, ku iu bashkua bashkëshortja e tij.
Ai tha se kishte dhënë tashmë një deklaratë të plotë para prokurorëve shqiptarë. Bashkëshortja dhe katër fëmijët e tij nuk ishin kërcënuar ndërsa jetonin në Shqipëri përpara se t’i bashkoheshin atij në Britani në shtator 2021.
“Këta njerëz kanë kryer vrasje për Kryeministrin me urdhër të tij dhe gjithashtu për Ministrin e Brendshëm. Unë kam prova. Ata nuk të paralajmërojnë kur do të të vrasin, thjesht vijnë për ty. Herën e parë kur erdhën të më qëllonin nuk më paralajmëruan apo kërcënuan më parë. Mund të shkoj dhe të jap dëshmi gjithashtu, por kam frikë për familjen time dhe bashkëshorten. Nëse shkoj në Shqipëri, ata do të më vrasin dhe, për të mos ndodhur kjo, do të më duhet t’i vras unë ata, dhe nuk dua të kryej asnjë krim duke u mbrojtur, u përgjigj Azizi.
Seanca për ekstradimin e Irfan Azizit vijon, ndërsa vendimi përfundimtar pritet të përcaktojë nëse ai do të rikthehet në Shqipëri për t’u përballur me drejtësinë apo do të qëndrojë në Britaninë e Madhe nën statusin e azilkërkuesit./Marrë nga Daily Mail