E PLOTË/ Si ndodhi atentati në Lezhë, 7 kundër 2! Kallashë, pistoleta e shkopa bejsbolli
Policia e Lezhës vijon hetimet intensive për zbardhjen dhe dokumentimin e ngjarjes së ndodhur në fshatin Rrilë, Njësia Administrative Shënkoll, Bashkia Lezhë, të dielën e 1 shkurtit, ku një shtetas mbeti i plagosur me armë zjarri.
Gerardo Ndoka, Eliseo Ndoka dhe Kevin Ndoka janë tre persona nga fisi Ndoka të shpallur në kërkim.
Ndërsa tjetri i shpallur në kërkim është i dyshuari si shënjestër, Merando Nikulaj, i cili ndodhej brenda në berberhane.
Por si ndodhi ngjarja?
Mbrëmjen e së dielës, një djalë i ri i fisit Nikulaj, djali i djalit të xhaxhait të Ardian Nikulajt, ra pre e një atentati. Merando Nikulaj, 21 vjeç, ishte duke prerë flokët në një berberhane në fshatin Rrilë të Lezhës. Ai kishte ardhur me makinë bashkë me mikun e tij, efektivin e policisë Besart Kovaçi.
Rreth orës 21:00, pranë berberhanes kanë ardhur dy makina. Nga këto makina kanë zbritur 7 persona, ku një pjesë prej tyre kanë pasur shkopinj bejsbolli në duar dhe dy të tjerë, sipas policisë, kanë pasur kallashnikovë.
Në këto momente, sapo i ka parë me armë, efektivi i policisë ka hapur zjarr në drejtim të 7 personave të armatosur dhe këta të fundit kanë qëlluar me breshëri në drejtim të berberhanes, duke qëlluar rreth 30 herë me kallashnikov.
Breshëria e plumbave kapi edhe pronarin e berberhanes, i cili njëkohësisht po qethte Merando Nikulajn, nipin e Ardian Nikulajt. 30-vjeçari Sokol Daci mori 5 plumba: 2 në kraharor, 2 në bark dhe 1 në këmbë, dhe ndodhet në intubim në Spitalin e Traumës në Tiranë.
Në berberhane ishte edhe efektivi Besart Kovaçi, i cili u ndalua sot me urdhër të Prokurorisë për shpërdorim detyre dhe moskallëzim krimi.
Polici civil, i cili shoqëronte Merando Nikulajn, edhe pse jo në detyrë, iu kundërpërgjigj me 10 të shtëna me armën e shërbimit breshërisë së agresorëve. Ai u ka thënë hetuesve se ndërhyri për t’i neutralizuar autorët, por nuk arriti të njohë asnjërin prej tyre. Ky reagim ka ndikuar edhe në largimin e të dyshuarve pa realizuar vrasjen e shënjestrës së tyre.
Ndërkohë, nga brenda berberhanes është qëlluar edhe me një armë tjetër, që dyshohet se mund të ketë qenë nipi i Nikulajt, i cili po ashtu ka pasur armë.
Merando Nikulaj bashkë me kushëririn e tij kanë pasur një konflikt në verë me njëri-tjetrin, pranë zonës së plazhit ku kanë edhe hotelin.
Dy djemtë e Nikulajve i kanë përplasur motorin djemve të fisit Ndoka, ku mësohet se janë konfrontuar fizikisht, me shkopa bejsbolli dhe sende të tjera të forta.
Merando Nikulaj është çuar në gjyq lidhur me sherrin që ka pasur me djemtë e fisit Ndoka.
