Dy të vrarë në Manëz, vetëdorëzohet i dyshuari
Vetëdorëzohet Gëzim Allçi, banues në Manëz, për të cilin Gjykata e Shkallës së Parë e Juridiksionit të Përgjithshëm Durrës kishte caktuar në mungesë masën e sigurimit “Arrest në burg”.
Allçi ishte shpallur në kërkim si i dyshuar për përfshirje në ngjarjen e ndodhur në tetor 2025 në Manëz, Durrës, ku mbetën të vrarë me armë zjarri dy shtetas.
Allçi ndihmoi Daniel Pepën të largohej nga vendngjarja. Pepa vrau Flori Paluçin, pasi i kishte vrarë shokun e ngushtë Aranit Kurti pas një sherri për kafe ekspres.
Durrës
Specialistët e Seksionit për Hetimin e Krimeve ndaj Personit në Drejtorinë Vendore të Policisë Durrës ekzekutuan vendimin e Gjykatës së Shkallës së Parë të Juridiksionit të Përgjithshëm Durrës, të datës 13.11.2025, e cila ka caktuar në mungesë masën e sigurimit “Arrest në burg” ndaj shtetasit G. A., 31 vjeç, banues në Manëz, Durrës, për veprat penale “Mbajtja pa leje dhe prodhimi i armëve, i armëve shpërthyese dhe municioneve” dhe “Përkrahja e autorit të krimit”.
Shtetasi G. A. ishte shpallur në kërkim, i dyshuar si i përfshirë në ngjarjen e ndodhur në tetor 2025, në Manëz, Durrës, ku mbetën të vrarë me armë zjarri dy shtetas.
Ky shtetas është vetëdorëzuar në DVP Durrës.
Gjithashtu, ky shtetas ka dorëzuar një send në dukje pistoletë (armë sportive me gogla), duke deklaruar se këtë e kishte me vete ditën e ngjarjes.
Materialet shtesë i kaluan Prokurorisë së Juridiksionit të Përgjithshëm Durrës, për veprime të mëtejshme.
