Detajet/ Si u ekzekutua Viktor Bardhi në Mirditë, ku të çojnë hetimet

Vrasja e 65-vjeçarit Viktor (Marku) Bardhi, e ndodhur mëngjesin e së enjtes në fshatin Ndërfushas të Mirditës, vijon të mbetet pa autor. Policia dhe Prokuroria e Lezhës kanë zhvilluar hetime intensive gjatë 24 orëve të fundit, ndërsa ende nuk ka një person të arrestuar për ngjarjen.

Rreth 10 persona janë shoqëruar dhe janë marrë në pyetje nga grupi hetimor. Mes tyre raportohet se ka edhe anëtarë të fisit Reçi, pasi një nga pistat që po verifikohet lidhet me një konflikt të hershëm dhe hakmarrje të mundshme mes familjeve.

Hetuesit po shqyrtojnë edhe historikun e përplasjeve mes fiseve në Mirditë. Gjatë tre viteve të fundit, tre anëtarë të familjes Bardhi janë vrarë. Mes viktimave janë Martin Bardhi, i ekzekutuar në Rrëshen në vitin 2023, dhe Kristjan Bardhi (Marku), i vrarë në Novoselë të Vlorës.

Personat e marrë në pyetje janë lënë të lirë pas dhënies së dëshmive, ndërsa hetimet vijojnë për të përcaktuar autorët dhe motivin e saktë të atentatit.

Një prej problemeve kryesore me të cilat po përballen hetuesit është mungesa e kamerave të sigurisë në zonën ku ndodhi vrasja. Për këtë arsye, grupi hetimor po analizon pamjet e kamerave të sigurisë në hyrje të Rrëshenit dhe përgjatë aksit të Rrugës së Kombit, me synim gjurmimin e lëvizjeve të automjeteve të dyshuara.

Sipas të dhënave paraprake, autorët dyshohet se kanë vepruar në mënyrë të organizuar dhe janë kujdesur të eliminojnë gjurmët. Viktor Bardhi u qëllua me armë zjarri, dyshohet me silenciator, rreth një kilometër larg banesës së tij në Ndërfushas.

Pas atentatit, automjeti i përdorur nga autorët u dogj në zonën e Munazit, në Rubik, rreth 10 kilometra larg vendit të ngjarjes.

Viktor Bardhi punonte pranë Ujësjellësit të Mirditës dhe në momentin e ngjarjes kishte dalë nga banesa për të kryer detyrën e tij dhe për të hapur furnizimin me ujë të pijshëm në zonë. Automjeti i tij, një Mercedes-Benz i bardhë, u gjet i qëlluar me breshëri plumbash.

Pavarësisht konflikteve të mëparshme mes familjeve, 65-vjeçari vijonte të jetonte dhe lëvizte normalisht, pa masa të posaçme mbrojtjeje.