Detaje të reja kanë dalë nga përplasja mes dy grabitësve dhe Policisë së Shtetit, ngjarje në të cilën njëri prej autorëve mbeti i plagosur, ndërsa tjetri u arrestua.
Sipas burimeve zyrtare, ndjekja nisi në orët e para të mëngjesit pas një telefonate urgjente nga drejtuesi i një automjeti tip “G-Class”, i cili denoncoi se dy persona të armatosur i kishin dalë përpara duke tentuar t’ia grabisnin makinën. Shoferi tregoi se arriti t’u shpëtonte duke u larguar me shpejtësi, edhe pse ata qëlluan me armë në drejtim të tij.
Policia arriti të identifikonte mjetin e grabitësve pranë zonës së Çifligut, në autostradën Tiranë–Durrës. Hetimet zbuluan se automjeti ishte vjedhur një ditë më parë, më 21 gusht, gjatë një grabitjeje me dhunë në një pikë karburanti në Sukth, ku autorët kishin sulmuar punonjësin dhe i kishin marrë të ardhurat ditore.
Pavarësisht ndjekjes nga policia, grabitësit vazhduan të rezistonin dhe u larguan në drejtim të Vorës. Forcat blu i rrethuan në afërsi të rrethrrotullimit që lidh rrugën kryesore me atë dytësore. Situata u bë edhe më e tensionuar pasi shumë pranë vendngjarjes ndodhej një lokal ku po zhvillohej një dasmë. Për të shmangur rrezikun, policia bëri evakuimin e të ftuarve.
Nga përplasja me armë, një prej autorëve, Ardit Domi, mbeti i plagosur dhe pas rreth 20 minutash rezistence vendosi të dorëzohej. Ndërkohë, bashkëpunëtori i tij, Lorenc Çali nga fshati Bilalas i Shijakut, vijoi të kundërshtonte urdhrat e policisë, por më pas pranoi të dilte nga makina pas negociatave të gjata me efektivët.
Pamjet e aksionit policor dhe momentet e thirrjeve për dorëzim janë fiksuar në disa video nga vendngjarja.