Një histori që duhet të hetohet, të paktën nga organet ligjzbatuese, pasi faktet janë evidente; një firmë bën punime para se të marrë leje! Dhe ku, në një nga vendet më të parapëlqyera për ndërtues, në Liqenin e Farkës. Denoncimi i VoxNews i disa ditëvë më parë hodhi driti mbi shumëçka, ku 17 pallatet 30 katësh kishin filluar të ndërtoheshin para se të merrej leja nga qeveria.
Faktet janë evidente, ku dy ndërtues “hije”, Bardhus Bushaj dhe Erion Gina, pronarët me letra të firmës “Lion Construction”, janë përdorur nga njerëz të tjerë VIP-a, të cilët kanë arritur që të lobojnë deri lart në qeveri për pallatet shumëkatëshe. Por, skandali duket akoma më i thellë përveç punimeve para lejës; kush e ka pronësinë e tokës në atë zonë?!
Dikur, zona ishte e gjelbër dhe pjesë e Liqenit të Farkës. Këtu nis edhe kalvari i gjatë, pasi persona që kanë pushtet dhe influencë në atë zonë kanë filluar “operacionin” për t’a përvetësuar. Pallatet do të ngrihen në pjesën lindore të Liqenit të Farkës, në një zonë të pjerrët dhe me përrenj të shumtë, që furnizonin Liqenin. Ndërkohë, siç edhe denoncoi redaksia jonë, zona ka filluar të sheshohet në muajin dhjetor 2024 dhe janar 2025.
Por, kush i ka bërë ato punime?!
VoxNews ka mësuar se firma që ka kryer ato punime është “Al Point” shpk, me pronar Aleksandër Vasili, një përmetar në origjinë, por që filloi të marrë tendera, leje nga KKT-ja, në momentin që u bë dhëndërr në familjen Qefalia. Ai është burri i vajzës së Kujtim Qefalisë, ish-kryetarit të Komunës Dajt dhe më pas u bë Administrator i Njësisë Dajt. Kujtimi është vëllai i deputetit të Partisë Socialistë, Xhemal Qefalia.
I shkruam këto radhë më sipër jo më kot, por ka dyshime të mëdha se vjehrri dhe vëllai i vjehrrit e kanë “ndihmuar” Vasilin për të kryer ato punime. Dy Qefalinjtë kanë ndikim mjaft të madh në zonën e Dajtit, të cilën e kanë drejtuar dhe njëri prej tyre është përfaqësues në Kuvendin e Shqipërisë. Ndërkohë, çuditërisht zona që ka kryer punime Vasili është në administrimin dhe në territorin e Njësisë Administrative Dajt.
A kishte lejë Vasili për të sheshuar të gjithë zonën para se të jepej leja nga KKT-ja?!
VoxNews ka mësuar se, pasi punimet pa leje të Aleksandër Vasilit për të sheshuar të gjithë zonën shembën një rrugë në pronë të Autoritetit Rrugor Shqiptar, është dhënë një dokument tjetër i dyshimtë nga Njësia Administrative Dajt. Në fakt, Njësitë Administrative as nuk japin më leje ndërtimi, por vetëm rrethimi dhe pa beton dhe punime të makinerive të rënda.
Të jetë koiçidencë që dokumenti të jepet nga Njësia Administrative Dajt?! Atje ku vjehrri i Vasilit ka “selinë” dhe “zonën” e tij, pavarësisht se Kujtim Qefalia është larguar nga roli i Administratorit dhe tashmë gëzon disa biznese të stërmëdha në zonën e Dajtit.
Dyshimet janë të mëdha se Dhjus Bushaj dhe Erion Gina kanë marrëveshje me Qefalinjtë për pronën ku do të ndërtojnë 17 pallatet nga 30 kate, por edhe një super kompleks afër tij.
Nëse s’ka ndonjë lidhje me kompleksin, përse Kujtim Qefalia ka “negociuar” me banorët që ankoheshin për punimet në muajin janar 2025? Si është përfituar e gjithë ajo pronë pjesë e Liqenit të Farkës? A mos ndoshta lidhjet e Qefalinjve me pushtetin kanë sjellë përfitimin e një prone të stërmadhe shtetërore?
Padyshim që faktet janë evidente dhe mjafton një hetim për t’i zbardhur. Të bësh punime pa dalë leja, të shembësh rrugën e të mos hetohesh, të marrësh një super pronë shtetërore dhe të mos të të hyjë “gjemb në këmbë”, padyshim që duhet të kesh lidhje deri sipër pushtetin qendror. Padyshim që përmetari Aleksandër Vasili s’i ka pasur, por njerëzit për të cilët ai ka punuar, vjehrri, vëllai i vjehrrit dhe VIP-at pas Dhjusit dhe Erionit, kanë lidhje të forta.
Këto lidhje e kanë shpërblyer Vasilin me disa leje nga vetë Këshilli Kombëtar i Territorit. Për të mos dalë në skenë të tjerët, dhëndërri i Qefalinjve ka përfituar në datën 31 korrik 2024 nga KKT-ja “leje zhvillimi për objektin ‘Sun Moon Star’, me vendndodhje në Bashkinë Tiranë, me subjekt zhvillues shoqerinë ‘Al Point’”. Bëhet fjalë për një supër kullë afër qendrës së Tiranës.
Por, leje për Vasilin është dhënë edhe në datën 26 mars 2025. Bëhet fjalë për lejen e ndërtimit për objektin “Fruit Depo Building”, me vendndodhje në Bashkinë
Tiranë. E njëjta firmë ka fituar edhe disa tendera nga Bashkia e Tiranës, në bashkëpunim me kompani të tjera me vlera miliona euro. Ndërkohë që Aleksandër Vasili ka qenë i proceduar më parë edhe për ndërtim pa leje në zonën e Farkës, por që më pas ia hodhi paq!
VoxNews shfletoi bilancet e kompanisë Al Point, me pronar 100 % Aleksandër Vasilin. “Sot më date 26 qershor2025, në ambientet e shoqërisë u zhvillua mbledhja e ortakut të vetëm për miratimin e pasqyrave financiare (bilancin) për periudhën 1 janar 2024 deri më 31 dhjetor 2024. Miratimin e rezultatit financiar, fitimin prej 6,197,115 lekë. Fitimi i vitit ushtrimor 2024 do të shkoi si rritje kapitali” thuhet në këtë dokument.
Pra, të fitosh tendera me vlerë miliona euro, të bësh punimet si nënkontraktor, apo të marrësh leje nga KKT për kulla dhe të dalësh me një fitim prej 62 mijë eurosh? Me këtë vlerë në Tiranë s’merr dot asnjë garsionere në periferi. A mos ndoshta firma Al Point është vetëm koperturë e VIP-ave apo biznesmenëve të tjerë?!
©CopyrightVoxNews